Nuummi ulloq unnuarlu angerlarsimaffiit ilaanni sulisut meeqqanik pinerliisimannginnermik uppernarsaateqanngitsortaqartut

Nakkutilliinermik Ingerlatsivimmeersut nalunaaqqaarnatik Nuummi meeqqanut inuusuttunullu ulloq unnuarlu angerlarsimaffiit ilaanni nakkutilleeqattaaqqammerput. Tamanna peqqussuteqaalunnerannik innersuussuteqaalunnerannillu kinguneqarpoq.

Allattoq Kim Hinrichsen

aggustip 09-at 2024 07:48

Nutserisoq Hanne Petersen

Meerartarisinnaasami amerlassusiligaanerannik sippuineq, pissaanermik atuinerit nalunaarutigineq ajorpai sulisullu meeqqanik pinerliisimannginnermik uppernarsaateqanngitsortaqarput.

Isumaginninnermut naalakkersuisoqarfiup Nakkutilliinermik Ingerlatsivimmeersut nalunaaqqaarnatik Nuummi meeqqanut inuuusuttunullu ulloq unnuarlu angerlarsimaffimmi MIA-mi 2024-mi maajip qiteqqunnerata juunillu naanerata akornanni nakkutilliisaqattaarneranni paasisat ilaat tamakkuupput.

Meeqqat inuussuttullu sumiginnagaasimasut aqqaneq-marluk 18-illu akornanni ukiullit MIA-mi najugaqarput.

Isumaqatigiissut naammassinngikkaa

Meeqqalli inuusuttullu tassani najugallit qulingiluaanerat, Nakkutilliinermik Ingerlatsivimmeersut MIA-mi nakkutilliisaqattaarnermi maluginiagaasa siulliit ilaanniippoq. Tassa MIA akuersissuteqarnani pingasunik meerartaqarpallaartoq paasinarsivoq, tamannalu Nakkutilliinermik Ingerlatsiviup isoraa.

Tallimanik inissalimmik immikkoortortaalersaarlutik, MIA-meersut aamma ilisimatitsissutigaat. Taamaaliulersaarnertilli Isumaginninnermut Aqutsisoqarfimmut ilisimatitsissutigisimanngikkaat aamma paasinarsivoq.

Aamma atuaruk Isumaginninnermi siunnersortit peqatigiiffiat: Suliaq Nuuk Outdoorimut tunngasoq nunatsinni tamarmi ajornartorsiutaavoq

Taamaammat MIA naalakkersuisullu ingerlatsinermut isumaqatigiissutiminnik naammassinninngitsutut, Nakkutilliinermut Ingerlatsiviup nalunaarusiamini inerniliuppaa. Taamaammat MIA meerartarisinnaasami amerlassusiligaanerat sippornissaanik nutaamillu immikkoortortaqalernissamik Nakkutilliinermik Ingerlatsiviup qinnuteqaqquaa.

Sulisut pineqaatissinneqarsimannginnermik uppernarsaateqanngitsortaqartut

MIA-mili sulisut pineqaatissinneqarsimannginnermik meeqqanillu pinerliisimannginnermik uppernarsaateqanngitsortaqarnerat suliami uani uissuumminarnersaagunarpoq.

Tamatuma MIA-miinnaanngitsoq Nuummili ulloq unnuarlu angerlarsimaffinni aamma allani ajornartorsiutaasarnera tusarnartaanngilaq, unioqqutitsilluinnarnerummalli MIA pineqaatissinneqarsimannginnermik uppernarsaatinik sulisunut tamanut noqqaalertoqqugini, Nakkutilliinermut Ingerlatsivik nalunaarusiamini allappoq.

Aamma atuarukAngerlarsimaffiup avataanut inissiisarnerit pillugit akissut tigoreerlugu: Iliuusissatut pilersaarut massakkorpiaq amigaatigaarput

Nakkutilliinermut Ingerlatsivimmeersut nalunaaqqaarnatik nakkutilliisaqattaarnerminni oqaloqatigisaat tassaapput MIA-p pisortaa, tassani sulisut, tassani najugallit qanigisaallu. Tassa nakkutilliilaavissimapput.

Tamannalu Nakkutilliinermut Ingerlatsiviup MIA-mut marlunnik peqqussuteqarneranik 15-inillu innersuussuteqarneranik kinguneqarpoq.

Peqqussutit innersuussutillu ilaat

Peqqussutit:

Nakkutilliinermik Ingerlatsivik peqqusivoq sulisunut tamanut pinerluuteqarsimannginnermik uppernarsaatinik ingerlaannaq piniassasoq.
Nakkutilliinermik Ingerlatsivimmit peqqussutigineqarpoq, paaqqinniffik akuersissummut tunngaviusunut, tamatumani saniatigut sammisanik aallartitsinernut atatillugu pingaarutilinnik allannguisoqarsimatillugu, Isumaginninnermut Aqutsisoqarfimmut paasissutissanik nammineerluni ingerlaannarlu nalunaaruteqassasoq.

Innersuussutit:

Tarnikkut ajuutit inuttullu ajoqutit pillugit paaqqinniffiup ilisimasaqalernissaanik Nakkutilliinermik Ingerlatsivik innersuussuteqarpoq.
Nakkutilliinermik Ingerlatsivik paaqqinniffimmut innersuussivoq sulisunut tamanut meeqqanik innarliisimannginnermut uppernarsaatinik ingerlaannaq piniassasoq.
Paaqqinniffimmi (suliffiup iluani) aappariittut inooqatigiinneq pillugu paaqqinniffiup najoqqutassiornissaanik Nakkutilliinermik Ingerlatsivik innersuussuteqarpoq.
Najugaqartunut sulisunullu pisortaq arlaannaannulluunniit atassuteqassanngitsoq (immikkoortitsissanngitsoq) Nakkutilliinermik Ingerlatsivik innersuussuteqarpoq.
Paaqqinniffiup pingaarnerusutigut ingerlanneqarneranik aqutsisut sulinerminni tunngaveqarnissaannik Nakkutilliinermik Ingerlatsivik innersuussuteqarpoq.
Aqutsisut aqutsinermik piginnaasaminnik qaffassaanissaanik Nakkutilliinermik Ingerlatsivik innersuussuteqarpoq.
Najugaqartut isumannaatsumik paaqqutarineqarnissaat atugarissaarnissaallu siunertaralugit najoqqutassiortoqassasoq Nakkutilliinermik Ingerlatsiviup paaqqinniffimmut innersuussutigaa.
Nakkutilliinermik Ingerlatsivimmit innersuussutigineqarpoq paaqqinniffimmit pissaanermik atuineq pillugu inatsit paasiniaqqissaarneqassasoq, taamaalilluni pissaanermik atuisariaqarnerit sapinngisamik ikinnerpaaffianiitinneqarniassammata.

Najoqqutaq: Nakkutilliinermut Ingerlatsivik.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.