-Isumaqarpunga uanga annilaanganartorujussuusoq naalakkersuinikkut inatsisit tikkuaannarneqartut, taavalu ilisimaneqartut tikkuaannarneqartut – kisiannili aamma akissuteqaammi iliuusissanik pilersaaruteqartoqanngitsoq. Tassa kommunit inatsisitigut sinaakkuserneqarnikuupput iliuusissamik sinaakkuteqarlutik qanoq iliornissaminnut.

Najaaraq Møller, Siumut sinnerlugu Inatsisartuni ilaasortaq taama isummerpoq.

Meeqqat Inuusuttullu pillugit Naalakkersuaq Aqqaluaq B. Egede (IA) meeqqat angerlarsimaffianniit arsaarinnissutigeriarlugit allamut erniinnaartumik nuutsinneqartarneri pillugit apeqquteqaatini akineqareersorlu taama isummerpoq.

Akissuteqaammi naammaginngilluinnarpaa:

- Naalakkersuinikkut taanna ajornartorsiut annertoorujussuaq uani akissuteqaammi itisilerneqanngitsoq qanoq iliornissamik taavalu kommunit akisussaasutut inissinneqanngitsoq / inissinniarneqanngitsoq uparuarneqarluni. Taamalugooq meeqqat angerlarsimaffiup avataanut inissinneqartartut nunatsinni amerlatigisut, akissuteqaat pilersaaruteqarnermik ersersitsinngitsoq Najaaraq Møllerip oqaatigaa.

Inatsiliornissamut pilersaaruteqartoqanngitsoq

Apeqquteqaat Aqqaluaq B. Egedemut januaarimi ukiormanna nassiuppaa.

Taamani KNR-imi meeqqat angerlarsimaffiup avataanut inissitat takornarialerisunit Nuuk Outdoorikkunnit, allaat nunaqarfimmi Kapisilimmi illuaqqani oqorsagaanngitsuni piffissap ilaani, najugaqartarnerat nutaarsiassani nangittussiani oqaluttuaraarput.

Kapisilinniinnerminni ulloq unnuarlu angerlarsimaffittut atorneqartut pitsaassusaannut allanut naleqqiulluni ajornerungaartumiipput, allaallumi inersimasunit ilinniarsimanngitsunit isumagineqarnerat oqaluttuaralutigu. Meeqqat nunaqarfimmiit kingorna illoqarfimmut nuunneqarput, taamaakkaluartoq paasissutissanik takusaqarsinnaanermik qinnuteqareernikkut paasineqarpoq meeqqat Nuuk Outdoorikkunnit suli isumagineqartut.

Meeqqat pillugit sammisaqaqattaarnerup kinguneraa, Aqqaluaq B. Egede Inatsisartunit nassuiaaqquneqarnera, ilaatigut KNR-imut ima oqaaseqarneranik kinguneqartoq: -"Inatsisinik sukaterinissaq pisariaqarpoq”.

- Una pisoq – imaannaanngitsutut isigisarput tamatta – uteqqissanngippat taava malittarisassat taakkua aaqqinneqassapput. Taamatut piffissami sivisutigisumi immikkut angerlarsimaffimmi inissiineq illoqarfiup avataani pisinnaajunnaarlugu taavalu aamma meeqqanut illersuutissanik sinaakkutinik pilersitsilluta, Aqqaluaq B. Egede taamanikkut oqarpoq.

Naalakkersuisulli suliamut tamatumunnga tunngatillugu Najaaraq Møllerip paamaarussinerarpai.

Aaqqiissutissamik nassaarnissaq

Najaaraq Møllerimut akissuteqaammi erserpoq, Naalakkersuisut isumaginninnermi suliassaqarfimmi kommunimi sulianik suliarinnittarnermut tunngatillugu suliamik aallartitsereersimasut. Naalakkersuisut suleqatigiissitamik pilersitsipput, pisortat ingerlatsineranni sullissinermik suliassaqarfik qanoq pitsanngorsaasinnaaneranik innersuussuteqartartussanik. Matumani siunertaavoq ”naliginnaasumik sulianik suliarinnittarnermik pingaartumik meeqqanut inuusuttunullu suliassaqarfimmi pitsanngorsaanissaq”.

- Taamaammat isumaqarpunga una akissuteqaat naalakkersuisuninngaanniit ikkattuararsuusoq, naak inatsisinik assigiinngitsunik taakkartuigaluartut.

Maannakkorpiaq ulloq unnuarlu angerlarsimaffittut akuerisaanngitsuni meeqqat arfineq marluk Nuuk Outdoor-mi isumagineqarput, ataaserlu annertuumik innarluutilik ulloq unnuarlu isumagineqartariaqarluni.

Taamaammallu Najaaraq Møllerip suliaq Nuuk Outdoorimut tunngasoq assersuutissaqqinnerarpaa meeqqat ulloq unnuarlu paaqqinnittarfiup avataanut inissittariaqartunut iliuusissanik pilersaaruteqartoqartariaqarnerarlugu.

Najaaraq Møller ip maluginiarpaa aamma siunnersuuteqartoqanngitsorluunniit:

- Inatsit nutaaq ukiaq akuerisarput tassani aamma taakkartorneqartoq siunissamut isigisorujussuaq – ungasinnerusumut – kisianni massakkuugallartumik kommunilluunniit naalakkersuisuninngaanniit akisussaaffimmik tigussinissaannik qulakkeerinnittussamik iliuusissaqannginnerat annikigivara. Najaaraq Møller oqarpoq.

Aamma nunatsinni 56.000-iinnaanerput eqqarsaatigalugu aalajangiipallanneq pisariaqarsoraa:

- Taavalu massakkoqqissaaq taakkununnga meeqqanut iliuusissatut pilersaateqartoqannginnera uippallernartorujussuuvoq. Massakkuusussaavormi iliuuseqartoqarnissaq.