Ilaqutariinnermut peqqissutsimullu ataatsimiititaliap meeqqat angerlarsimaffiup avataanut inissinneqartartut takornarialerisumit Nuuk Outdoorimit paarineqarnerat pillugu naalakkersuisoq Aqqaluaq B. Egede siunersiorpaa.

Aqqaluaq B. Egede Inatsisartunut ilaasortanit akunneq ataaseq apeqqarissaarfigineqareerluni ataatsimiittarfimmit “Erling Høegh”-imit anillappoq, siunersiuinerlu pitsaasumik ingerlasimasoq oqaatigimisaarlugu.

- Oqaaseqarfigerusuttorujussuuara, kisianni ataatsimiinnermi qamani pisut matoqqasuusaramik kukkussanngikkuma… Kisianni kiinaannguusaarlunga aninngilanga, Aqqaluaq B. Egede oqarpoq.

Ataatsimiititaliamulli ilaasortat ilaat taama isumaqanngillat. Bjørk Lange Olsen apeqqutit akissutininngaanniit amerlanerusimasut ataatsimiinnerup kingorna ilaatigut oqarpoq. Tassalu naalakkersuisup akissutai naammaginngilai.

- Naamik imatorsuunngitsoq. Naammaginnilissagutta suli erseqqisaanissamik amigaateqarluta isumaqarpunga, Bjørk Lange Olsen oqarpoq.

Kisimi taama isumaqanngilaq, naalakkersuisummi parteeqataata Eqaluk Høeghip ataatsimiinnermi akissutisiani naammaginngilai.

- Kisianni maannangaaq aamma ilanngullugu oqaatigisinnaavara uanga kissaatigigakku una suliaq ilungersunarpallaaqimmat akissutillu pissarsiagut naammaginnginnakkit kukkunersiuinermut ataatsimiititaliamut ingerlateqqinneqarnissaa kissaatigaara, taanna oqarpoq.

Akisussaaffik allamut tunniukkaa

Aqqaluaq B. Egede ataatsimiinnermi avaqqutaariinnanngitsoq, kisianni aamma akisussaasuuseqarusunngitsoq Bjørk Lange Olsen isumaqarpoq.

- Aqqaluaq B. Egedep Kommuneqarfik Sermersuumi parteeqatini borgmesteri Avaaraq Olsen akisussaasuutippallaaraa misigisimavunga. Nuuk Outdoorimut tunngasorpassuit kommunip akisussaaffigigaai erseqqissartarpaa, Bjørk Lange Olsen oqarpoq, nangillunilu.

- Taamaammat borgmesterip Avaaraq Olsenip sisamanngorpat naapeqatiginissaanut qilanaarpunga. Taassuma suliamut isumaa meeqqallu angerlarsimaffiup avataanut suli inissinneqarsimasut pillugit susoqarnersoq paasisaqarnissannut tusassallugu erinisuppunga, Bjørk Lange Olsen oqarpoq.

Aqqaluaq B. Egedep nunatsinni meeqqat angerlarsimaffiup avataanut inissinneqarsimasut iluamik paarineqarsinnaat qulakkeerniarlugu inatsimmik allannguisoqarnissaa pisariaqartoq nassuerutigaa:

Naalakkersuisut ulloq unnuarlu angerlarsimaffiit kommunillu suleqatigalugit suleqatigiissitamik ukiaq pilersitsisimasut taassuma aamma paasissutissiissutigaa. Suleqatigiissitaq nalunaarutinik inatsisinillu suliaqarnermik misissuissasoq Aqqaluaq B. Egede oqarpoq,

KNR-ip suliaq juullip ukiortaallu akornanni sammingaatsiarpaa. Suliaq Kommuneqarfik Sermersuup inuusuttuaqqanik pinasuartumik angerlarsimaffiup avataanut inissitaminik, nunaqarfimmi Kapisilinni illuaqqani attartukkani, takornarialerisartunut Nuuk Outdoorimut paarineqartussanngortitsineranut tunngavoq.

Pinasuartumimmi inissinneqarsimasut tamarmik pisariaqartinneqartutut inissaannik nassaarussinnaanngilai. Taamaammat kommunip nammineq oqarnera naapertorlugu Nuuk Outdoor ajornartoornermi aaqqiissutitut atorneqarpoq. Uanili Nuuk Outdoorimi sulisunik inuusuttunik immikkut pisariaqartitsisunik paarsinissamut ilinniarsimasoqannginnera ajornartorsiutaavoq. Aammattaaq Nuuk Outdoor suliniutit taaneqartartumik inissiiffiummat – tassa ulloq unnuarlu inissiisarfiunngimmat inissiinerit nakkutilliiffigineqanngillat.

Nunaqarfimmiorpassuit meeqqat atugarissaarpasinngitsut oqaatigaat: Kapisilinni aasaq aserorterisut, tillinniartut, gassinik naamaartut ikuallatsitsisullu nalaanneqarput.

KNR-ip saqqummiinerata kingorna meeqqat Nuummut nuutsinneqartut kommunip oqaatigaa. Taakkuli qanoq pineqarumaarnissaannut suli pilersaaruteqartoqanngilaq.

Suliaq naammasseqqajanngitsoq

Bjørk Lange Olsenittaaq suliaq ataatsimiititaliamut naammasseqqajanngitsoq erseqqissarpaa. Suliamut ilungersunartumut assingusumik pisoqaqqinnginnissaa Nuuk Outdoorimilu meeqqat pitsaasunik atugaqartinneqarnissaat qulakkeeqqaarlugu suliaq naammassissagitsik taanna oqarpoq.

- Suliaq naammassigallarunnanngilaq. Qujanartumillu pissutsinik ernumassuteqartuni kisimiippasinngilanga. Ataatsimiititaliamut ilaasortat arlaliulluta taama isumaqarpugut, Bjørk Lange Olsen oqarpoq.

Inatsisartunilu suliaq ilungersunartoq suliarineqartoq qulaajarneqassasorlu, Eqaluk Høeghip oqaatigaa.

- Soorunami aamma nakkutilliisussaatitaanermut tunngasoq, kommunip nakkutilliisussaatitaanera kiisalu naalakkersuinikkut nakkutilliisussaatitaanera tunngasoq ilumut qanorpiarlu malinneqarsimanersoq inatsisit najopqqutaralugit taakku aamma qulaajarneqassapput pinngittuuvillutik.