Nuummi tusagassiortunik katersortitsineq: Issittoq pillugu allartitaq isumaqatigiissuteqarfiunngitsoq

Naalagaaffeqatigiinni naalakkersuisut siulittaasui ullumi ataatsimiipput.

Allattoq Hanna Vestergaard Hviid

juunip 06-at 2023 20:10

- Nunarsuarmi suli eqqissiviilliorfiusumi inuuvugut, Rusland suli sassussiumatuneruvoq. Avannaani suleqatigiinnerput pitsanngorsassavarput. Illersornissamut isumaqatigiissut oqaluuseraarput, tassanilu Kalaallit Nunaat Savalimmiullu ilanngutitinneqassapput.

Danskit ministeriunerat, Mette Frederiksen Nuummi Hans Egedep Illuani tusagassiortunik katersortitsinermi oqarpoq.

Aamma atuarukAtaatsimiinnerup nutaap Naalagaaffeqatigiinnerup iluani suleqatigiinneq nukittorsassagaa

Naalagaaffeqatigiinni naalakkersuisuni siuttut Nuummi ulluni makkuni naalagaaffeqatigiit ukiumoortumik ataatsimiinneranni katersuupput.

Ullumi Nunanut allanut tunngasunut, Sillimaniarnermut Illersornissamullu Attaveqaatinut ataatsimiititaliami Danmarkimit, Savalimmiunit nunatsinniillu peqataaffigineqartumi ataatsimiittoqarpoq.

Issittoq pillugu aallartitamut atatillugu isumaqatigiissuteqartoqanngitsoq

Naalakkersuisut danskillu naalakkersuisuisa issittoq pillugu aallartitamut atatillugu oqaloqatigiinnertik nangeqqissagaat, Múte B. Egede katersortitsinermi oqarpoq.

- Pitsaanermik aaqqiissuteqassagut aalajangerneqarpoq. Atuuffiup qanoq inuttalerneqarnissaanut tamatta immikkut tunngavilersuuteqarpugut, taanna oqarpoq.

Danmarkip kalaallimik toqqaanani danskimik aallartitamik atuuffimmut atuutsitsilernera aalassassutigineqangaatsiarpoq.

Naalakkersuisut siulittaasui marluk oqarnerat naapertorlugu aaqqiissutissarsingajalernissartik naatsorsuutigaat.

Naalagaaffeqatigiit siunissaat

Mette Frederiksenip naalagaaffeqatigiinnerup siunissami qanoq isikkoqarnissaa oqaluuserisimagitsik oqaatigaa.

Siunissap qanoq nassataqarumaarnera Kalaallit Nunaata Savalimmiullu suliassaraat. Kalaallit Nunaat kalaaliuvoq, taanna oqarpoq.

Naalagaaffeqatigiit assinganik iluseqarnissaa naatsorsuutiginagu ukiullu 50-it qaangiuppata allanngorsimassasoq oqaatigaa.

Múte B. Egede nunatta Savalimmiullu nunanut allanut tunngasunut pisinnaatitaanissamut isumaqatigiinniaqqinnissaq kissaatigineraat aperineqarpoq.

- Ullumikkut ilusilersornera qajannaatsuunngitsoq oqaruma taava isumaqarpunga apeqqut akineqartoq, taanna oqarpoq.

Arnat spiralilersuisoqarneranit eqqugaasimasut akerliussutsimik takutitsisut

Múte B. Egede aamma Mette Frederiksen Hans Egedep Illuata saani inatsisisitigut ataataqanngitsunit aamma arnanit spiralilersuisoqarneranit eqqugaasimasunit akerliussutsimik takutitsisunik naapitsipput.

Mette Frederiksen Naja Lyberthip nammineq kajumissuserinngisaminik spiralilerneqarsimanini pillugu oqalugiarmat attortissimalluni oqarpoq.

- Danskit ukiorpassuit matuma siorna politikkiannit misiliutaavoq iluatsinngitsoortoq, taanna oqarpoq.

Spiralilersuisimaneq naatsumik

- DR-imit tusarnaagassiap ”Spiralkampagnen”-ip niviarsiaqqat arnallu tusindilikkaat danskit oqartussaasuisa kalaallit inuiaqatigiit amerliartornerannut killiliiniarlutik 1966-imit 1975-imut spiralilersorneqarsimanerat saqqummiuppaa.

- Arnat arlallit spiralilerneqarnertik pinngitsaaliinertut naapertuilluanngitsuliornertullu misigisimallugu tusarnaagassiami oqaluttuaraat.

- Naalakkersuisut danskillu naalakkersuisui 1960-imit 1991-imut, tassa peqqinnissamut oqartussaaffiup nunatsinnit tiguneqarnissaata tungaanut spiralilersuisoqarneranik qulaajaanermik aallartitsiniarlutik septembarimi isumaqatigiissutigaat.

Suliap ingerlaqqinnera

- Maannali arnat arlallit akuersissuteqaratik spiralilerneqarnermik allanillu naartunaveersaaserneqarnermik 1990-ip 2000-llu akornanni nalaataqarsimallutik oqaatigaat.

- BBC-p arnat sisamat 2000-ikkut aallartinneranni akuersissuteqaratik spiralilerneqarsimasut oqaloqatigai.

- Anna Jørgensen akuersissuteqarani 1995-imi spiralilerneqarsimasoq pillugu oqaluttuaq decembarimi saqqummiupparput.

- Emma Kuko spiraleqarluni 2019-imi misissortinnermini ilisimatinneqarsimasoq pillugu oqaluttuaq qaammammi uani saqummiupparput.

Allisiguk

Taassumali arnanut utoqqatsertoqassanersoq aalajangiiffigissallugu spiralilersuisoqarsimanerata qulaajarneqarnerata naammassinissaa utaqqiniarpaa.

Danskit ministeriunerat, Naalakkersuisut siulittaasuat, savalimmiormiullu lagmandiat pingasuinnaallutik najuuffigisaminnik naalagaaffeqatigiit pillugit aqagu ataatsimiivissapput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.