Nuummi tunillatsissimasut amerlangaatsiarput: Ippassarmit 17-it tunillatsissimasut paasineqartut
Tunillatsissimasut nutaat 17-it ippassarmit paasineqarput.
Taakkunannga aqqaneq-marluk meeraapput, tunillatsissimasuni inersimasut tallimat meeqqanut tunillatsissimasunut angajoqqaapput, Nakorsaaneqarfik taama paasissutissiivoq.
Nuummi tunillatsissimasut ippassaq arfineq-marluupput.
Tunillatsissimasut kommunikkaarlugit ima amerlassuseqarput:
- Avannaata Kommunia: Tunillatsissimasoq ataaseq
- Kommune Qeqertalik: Pingasut
- Qeqqata Kommunia: 36-t
- Kommuneqarfik Sermersooq (Nuuk kisimi): 24-t. Tamanna nunatsinni ippassarmit nutaanik tunillatsissimasoqarfiuvoq.
- Kommune Kujalleq: 0
Nuummi tunillatsissimasut katillugit ullumikkut 24-upput - taakkulu aatsaat taama amerlatigipput. Nuummi tunillatisssimasutut nalunaarsorsimasut amerlanerpaagamik aggustip 19-iani 17-iupput.
AAMMA ATUARUK Nuummi paaqqinnittarfimmi Timmiaaqqani meeraq sulisorlu coronavirusimik tunillatsittut
Nuummi tunillatsissimasut nutaat pingasut ataasinngornermi unnukkut paasineqarput – paaqqinniffimmi Timmiaaqqani meeraq sulisorlu tunillatsissimaspput. Taamaammat meeqqat sulisullu misissortinneranni paaqqinniffik ippassaq matoqqatinneqarpoq.
Paaqqinniffik ullumi aamma matoqqavoq.
USK-imi atuartoq tunillatsissimasoq
Nakorsaaneqarfik naapertorlugu tunillatsissimasut ilaat meeqqat atuarfinni atuartuuvoq, atuareernermilu ornittakkamiittartuulluni.
- USK-imi atuartoq ataaseq Coronavirusimik tunillatsissimavoq. Atuartup atuaqatai angerlartinneqarput, aammalu angajoqqaat kaammattorneqarput meeqqatik misissorteqqullugit. Atuartoq tunillatsissimasoq napparsimanngilaq ersiuteqaraniluunniit.
AAMMA ATUARUK Dagens coronatal: Syv nye smittede
- Aamma atuartup tunillatsissimasup sunngiffimmi ornittagaq AKO Narsarmiutaq ornittarpaa. Taamaattumik Narsarmiutaq aamma ullumi matoqqagallarpoq, aammalu angajoqqaat kaammattorneqarput meeqqatik misissorteqqullugit.
Tunillatsissimasut ilaat Nuup Timersortarfiata eqqaani septembarip tallimaani nalunaaqutaq 15-16-ip missaani tivolimiissimavoq.
Inuit toqqaannartumik attavigineqassasut
- Ilaqutariit eqqugaasut toqqaannartumik nalunaarfigineqassapput, kisiannili namminneq imaluunniit meeqqatik tunillatsissimasunut attaveqarsimassasut pasitsaassisut tamarmik pilertornerpaamik misissorteqqullugit kaammattorneqarput. Misissuivik ullumi nalunaaqutaq 14-ip tungaanut ammassaaq, Nakorsaaneqarfik paasissutissiivoq.
Nunatsinni tunillatsissimasut aggustip qiteqqunnerani amerlanerpaapput, tassani tunillatsissimasut 103-upput, piffissamilu tassani coronamik tunillatsissimasunik nutaanik ullut tamaasa paasisaqartoqartarpoq.
Nunatsinni tunillatsissimasut katillugit maanna 64-iupput.
