Corona pillugu ullumikkut kisitsisit: Tunillatsissimasut nutaat arfineq-marluk 

Tunillatsissimasuni nutaani sisamat Sisimiuniittut, pingasut Nuummiipput.

Nuummi tunillatsissimasuni pingasuusuni ataaseq Majoriami ilinniartuuvoq. Taamaammat tunillatsissimasup ilinniaqatai tamarmik ullumi misissortissapput.

Taama Nunatta Nakorsaaneqarfia nalunaaruteqarpoq.

Ullaaq nalunaarutigineqareersutut Nuummi tunillatsissimasut allat marluk tassaapput meeqqerivimmi Timmiaaqqani sulisoq ataaseq meerarlu meeqqivimmiittartoq.

Nuummi pineqartuni taakkunani marlunni tuniluunnerup aallaavia ilisimaneqanngilaq.

Nuummi misissortittussat amerlammata misissuivik marlunngornermi pingasunngornermilu ualikkut nalunaaqutaq marlup tungaanut immikkut ittumik ammatinneqassaaq. 

Nunatsinni tunillatsissimasut katillugit maanna 47-pput. Taakku kommunikkaarlugit imaapput:

• Avannaata Kommunia: Tunillatsissimasoq ataaseq.
• Kommune Qeqertalik: Tunillatsissimasut pingasut.
• Qeqqata Kommunia: 36-t.
• Kommuneqarfik Sermersooq: Arfineq-marluk.
• Kommune Kujalleq. Tunillatsissimasoqanngilaq.

Tunillatsissimasut aggustip qiteqqunnerani amerlanerpaammata 103-upput.

Naalakkersuisut nunatta ammariartuaarnissaanut pilersaarut tallimanngormat saqqummiuppaat. Pilersaarummi tassani Upernavimmut Aasiannullu malittarisassat sukannersut atorunnaarsinneqarput - maannalu Sisimiut nunatsinni sumiiffinni kisiartaalluni corona pillugu malittarisassaqarfiulluni.

Malittarisassat taakku oktobarip 31-at ilanngullugu atuutissapput.

Naalakkersuisut oqarnerat naapertorlugu - tamanna Sisimiuni inuiaqatigiinni tuniluuttoqarneranik pissuteqarpoq. Tassa imaappoq tunillatsissimasut tunillatsiffigisaat oqartussanit tamakkiisumik ilisimaneqanngillat.

Malittariasassat Sisimiut suli atuuttut aaku:

• Inuit 20-nit amerlanerusut – silami illullu iluani kateqqusaanngillat.
• Neriniartarfinni, imerniartarfinni, katerinnerni, timersortarfinni aamma napparsimmavinni, pisiniarfinni, kommunip allaffiini pisortalluunniit ingerlassissutaanni qanermut assiaquteqassaatit.
• Pisortat ingerlassissutaannut ilaaniaruit tamakkiisumik kapitissimassaatit. Bussinut, timmisartumut umiatsiamut attartukkamut aatsaat tamakkiisumik kapitissimaguit ilaasinnaavutit.
• Akiuussutissamik kapitissimanak nammineq najukkannut angalaniarlutit umiarsuarmut, timmisartumut ilaasinnaatitaavutit aamma ilinniariarlutit aallarsinnaatitaalluvutit, taamaaliornissamut tunillatsissimannginnermut uppernarsaammik sivisunerpaamik akunnernik 48-nik pisoqaassusilik pigissavat. Tamanna akiuussutissamik kapitikkiartorlutik umiarsuarmut timmisartumulluunniit ilaaniaruit aamma atuuppoq.
• Tamakkiisumik akiuussutissamik kapitissimanngitsut tamarmik Upernavimmit, Sisimiunit Aasianniillu angalaniartut nunatsinni angalaffigisaminnut tikinnerminni ulluni tallimani angerlarsimaannassapput ullullu tallimassaanni misissortillutik.
• Sinersortaat Sarfaq Ittuk tamakkiisumik akiuussuserneqarsimasunit taamaallaat ilaaffigineqarsinnaavoq. Immikkut akuersissuteqartoqarnissaanut periarfissaqanngilaq.
• 18-it inorlugit ukioqaruit maleruaqqusat ilinnut atuutinngillat.
• Nutaatullu inuit coronamik tunillatsissimasut tunillatsissimanerminnit sapaatini akunnerni aqqaneq-marlunni tamakkiisumik akiuussuserneqarsimasutut isigineqassapput.