Nuummi toqutsisoqarnerani suliaq: Politiit pingaaruteqartumik paasisaqartut
Angut 20-nik ukiulik arnamik 82-inik ukiulimmik toqutsisimasutut politiinit tigummineqarallartussanngortinneqarpoq. Arnaq Nuummi Ceresvejimi inigisami toqungasoq nassaarineqarpoq.
Kalaallit Nunaanni Politiit tusagassiuutinut nalunaarummi allapput.
20-nik ukiulik angullu alla kilisaammik tallimanngornermi ualikkut tikikkamik tigusarineqarput.
Aappaa inatsit tunngaviusoq naapertorlugu killisiorneqarpoq, taannalu toqutsisutut, ikuallatsitsisutut toqungasullu timaanut assuarnartuliortumik iliuuseqarsimasutut pasineqarluni.
Pasineqartoq pasinniissutinut pingasunut tamanut pinngitsuunerarpoq.
Politiit umiarsuarmi inini paasissutissarsiortut
Politiit misissueqqissaarnerminni paasissutissaasinnaasunik qulakkeeriniarlutik tigusarineqartut umiarsualivimmut tikimmata taakku umiarsuarmi inigisaat misissueqqissaarfigaat.
- Misissueqqissaarnitsinni angummik 20-nik ukiulimmik tigusarinnillutalu tigummigallaanissatsinnik kinguneqartumik pingaarutilimmik paasissutissarserpasinnerput soorunami ilorrisimaarutigilluinnarparput, misissueqqissaarnermi pisortaq, politiinspektørip tullersortaa, Lars Bjerregaard, oqarpoq.
Taassuma politiit suliamik suli misissueqqissaartut oqaatigaa. Innuttaasullu suliamut atatillugu paasissutissaateqarunik politiinut 70 14 48-mut attaveqarnissaannik aamma kaammattuuteqarfigaat.
AAMMA ATUARUK Ikuallattoqarnera toqutsisoqarneratut misissorneqartoq: Misissukkat tamarmik pasitsaassaqarnissamut atorsinnaapput
- Tusarsimasat takusimasalluunniit naleqqunnersut nalornissutigigaanni taava sianerneq sianinnginnermit pitsaaneruvoq.
Politiit suliamut atatillugu pasineqartumit amerlanerunik pinerluttoqarnersoq paasiniarsaraat.