Ikuallattoqarnera toqutsisoqarneratut misissorneqartoq: Misissukkat tamarmik pasitsaassaqarnissamut atorsinnaapput

Kalaallit Nunaanni politiit Ceresvejimi ikuallattoqarnera toqutsinermik peqquteqarsoraat.
januaarip 31-at 2023 18:59

Kalaallit Nunaanni politiit tusagassiutinut nalunaarput Nuummi ippassaq marlunngornermi inissiami Ceresvejimi blok O-mi arnap ajunaarneranik kinguneqartumik ikuallattoqarnera toqutsinermik tunuliaquteqarsimagunartoq, politiit taama tusagassiutinut allapput.

Ikuallattoqarnerata kingorna arnap inuunini ippassaq marlunngornermi ullaakkut annaavaa.

Ceresvejimi inissiaq nutaanngitsoq ippassaq ullaakkut arfineq-marluk qaangilaaraa ikuallalerpoq inissiamilu inilik ajunaarpoq, taama Nuummi politiini pigaartoq Brian Thomsen oqarpoq.

- Ikuallanneq aqunneqarsinnaalermat qatserisartut inummik nassaarput taannalu toqukkut qimaguppoq, toqussutaasorli suli ilisimaneqanngitsoq taanna oqarpoq.

Ikuallanneq sumik peqquteqarnersoq suli aamma oqaatigineqarsinnaanngilaq.

- Sukumiinerusumik misissueqqaartariaqarpugut, taanna oqarpoq.

Misissuisoqarneraniilli manna tikillugu suli inummik tigusarinnittoqanngilaq.

Brian Thomsenip misissuinerminnut atatillugu innuttaasuniit ikiorneqarnissartik neriuutigaat, tamatumalu nalaani tassa marlunngornerup unnuaaniit ullaanngornissaata tungaanut pasinarsinnaasumik pissusilersortoqarneranik pasitsaassisoqarsimasinnaanera politiiniit eqqumaffigeqquneqarpoq, soorlu blok O-p eqqaani nakkutilliissummik assiliiveqartoqarsimassappat blok O-llu tungaanut sammisumik taanna assiliisimassappat politiinut nalunaarutigineqaqquneqarpoq.

Marlunngornermi kingusissoq tikillugu politiit pasisaminnik tigusarinnissimanngitsut erseqqissaatigineqarpoq, taamatullu aamma arnap toqusup ukiui nalunaarutigineqaratik.

Taamatuttaaq inuit Kongevejimi, Tuujummi Ceresvejimilu najugallit alaatsinaalluaqquneqarput.

Misissukkat tamarmik atorsinnaapput pasinartoqarlutillu, Kalaallit Nunaanni politiit erseqqissapput.