Pisiniarfinni sulisut ulluni tulliuttuni ulapputissapput. Aningaasarsisut saniatigut akileraarutinik utertoortoqassaaq. Nuummi Pisiffimmi pisortap, Thomas Kristensenip, pissangalluni pisiniartusarpassuit piareersarfigai.
- Ussassaaruterpassuarnik nassiussuereerpugut, immikkullu akikilliliilluta. Ullaakkut arfineq-marluniit unnukkut quligiluap tungaanut ammassaagut. Maanilu sulisut tamarmik sulissapput. Qaammammusiallit qaammammusipput. Utoqqalinersiutisiallit suliunnaarnermusiallillu ullaap tungaani pisiniarrattarput ualineranilu sulisut soraarnerminni niuerniartarlutik, Nuummi Pisiffimmi pisortaq Thomas Kristensen oqarpoq nangillunilu:
- Kisitsisinik taasinngikkaluarlunga marloriaammik pingasoriaammilluunniit isertitsinissarput ilimagaara. Ulloq naallugu sulisut tamarmik sulissapput nunguutsinnginniassagattalu ilioraavinnik immiisoqartassaaq, Nuummi Pisiffimmi pisortaq Thomas Kristensen naggasiivoq.