Nuummi nakuusernermut suliat imigassamik aalakoornartortalimmik inerteqquteqarnermi ikileriarujussuartut
Nuummi nakuusernerit imigassamik aalakoornartortalimmik inerteqquteqarnermi ikileriarujussuarput.
- Nakuusernerit imigassamik aalakoornartortalimmik inerteqquteqarnerup nalaani ikileriarujussuarput, politimesteri, Bjørn Tegner Bay, tusagassiortunik apriilip ulluisa 24-anni oqarpoq.
AAMMA ATUARUK Naalakkersuisut indfører alkoholforbud i Nuuk, Kapisillit og Qeqertarsuatsiaat
Politiit kisitsisinik politimesterip oqaasiinut uppernarsaasunik KNR-imut nassiussipput.
Tal fra Grønlands Politi.
Nuummi imigassamik aalakoornartortalimmik arfininngornermi marsip ulluisa 28-anni inerteqquteqalerneranit sapaatit akunnerat siulleq illoqarfiit pingaarnersaanni nakuusernernut aqqusinermilu perulluliornermut suliat sisamat politiinit nalunaarsorneqarput. Sapaatit akunnerata tulliani suli ataasiinnaavoq.
Tassalu nakuusernernut aqqusinermilu perulluliornermut suliat sapaatit akunnerini 14-imi 15-imilu inerteqquteqarnermi katillugit tallimaapput.
AAMMA ATUARUK Unicef: Imigassamik matusigallarneq ajunngilaq - eqqissiviilliortoqarsinnaavorli
Nakuusernermut aqqusinermilu perulluliornermut suliat aqqanillit politiinit inerteqquteqalernissamut sapaatit akunnerani nalunaarsorneqarput.
Inerteqquteqarnerup nalaani kisitsisit aamma siorna piffissap taamaalinerani kisitsisinut sanilliullugit appasinnerupput. Nakuusernermut suliat 2018-imi 2019-imilu qulit missaanniipput.
Aamma angerlarsimaffinni eqqissiviilliornernut suliat imigassamik aalakoornartortalimmik inerteqquteqarnermi sapaatit akunnerisa siuliinut sanilliullugit ikileriarput.
AAMMA ATUARUK Flere har henvendt sig til Allorfik under alkoholforbud
Angerlarsimaffinni eqqissiviilliornerit 20-t missaanniittut politiinit inerteqquteqalinnginnermit sapaatit akunnerit siuliini marlunni nalunaarsorneqartut, inerteqquteqalernermiillu sapaatit akunnera siullermi arfineq-marluk nalunaarsorneqarput. Arfinillit sapaatit akunnerata tulliani nalunaarsorneqarput.
- Kisianni siorna piffissap taamaalineranit ikinnerulinngillat. Aap angerlarsimaffinni eqqissiviilliornerit ikileriarput, kisianni inerteqquteqarneq pissutaanersoq oqaatigisinnaanngilara, Bjørn Tegner Bay oqarpoq.
AAMMA ATUARUK Nuummi aqagu quliniit imigassarsisinnaaleqqissaatit
Kisianni nakuusernermut aqqusinernilu perulluliornermut taavalu angerlarsimaffinni eqqissiviilliornernut kisitsisit inerteqquteqarnerup apriilip ulluisa 15-ianni atuukkunnaarsinneqarnerata kingorna amerleriarput.
Angerlarsimaffinni eqqissiviilliornermut suliat inerteqquteqarnermi sapaatit akunnerata tulliani arfiniliusut, inerteqquteqarunnaarnerata kingorna sapaatit akunnerani siullermi 28-upput. Aamma nakuusernermut aqqusinernilu perulluliornermut suliat ataatsiminngaanniit 13-inut amerleriarput.
