Nuummi, Kapisilinni Qeqertarsuatsiaanilu imigassat matuneqarallartut
Naalakkersuisut Siulittaasuat Kim Kielsen aalajangerpoq imigassat aalakoornartortallit 2,25 procentimit kimittunerusut tamarmik Nuummi, Kapisilinni Qeqertarsuatsiaanilu tuniniarneqartarneri sassaalliutigineqartarnerilu inerteqqutigineqarallassasut.
Naalakkersuisut nittartakkaminni taama nalunaaruteqarput.
Atuarfiit, paaqqinnittarfiit, neriniartarfiit imerniartarfiillu kiisalu kulturikkut aaqqissuussat matuneqarnerisa nalaanni angerlarsimaffinni imigassamik atuineq oqartussanit qanimut malinnaaffigineqarpoq.
Taama ineriartortoqarnera meeqqanut ilaqutariinnullu taamaallaat eqquinavianngilaq, coronavirusilli tuniluunnerata siaruarnissaanut annertunerusumik aarlerinaateqalersissavaa imigassartorfiusumi ataatsimoortoqartillugu inuit tunillaassuuttoqarsinnaanera eqqumaffigineq ajormassuk.
Nuummi massakkut tunillatsissimasut 10-t naammattoorneqarput.
- Pissutsit taamaatillugit nappaatillu siaruaqqinnissaa pinaveersaarniarlugu maleruagassaliortariaqartarpugut. Taamatulli aalajangerninni qitiutitakka tassaapput meeqqat, taakkumi toqqissillutik angerlarsimasinnaasariaqarput, Naalakkersuisut Siulittaasuat Kim Kielsen taama oqarpoq.
Taamaattumik Naalakkersuisut aalajangerput imigassanik aalakoornartortalinnik tuniniaasarnerit sassaalliuteqartarnerillu marsip ulluisa 28-anni nalunaaqutaq unnukkut arfineq pingasunit apriilip ulluisa 15-iata tungaanut inerteqqutigineqarallassasut. Taamatut aalajangernermi najugaqarfiit pineqartut tassaapput: Nuuk, Kapisilit Qeqertarsuatsiaallu.
