Nuummi aqagu quliniit imigassarsisinnaaleqqissaatit
Nuummi imigassamik inerteqquteqarneq aqagu pingasunngornermi qulinut atorunnaassaaq – sivitsorneqassanngilarlu.
Tamanna Naalakkersuisut siulittaasuata, Kim Kielsenip tusagassiuutinut nalunaarutigaa.
Illoqarfiit pingaarnersaanni imigassaq marsip ulluisa 28-anni inerteqqutigineqalermat coronamik tunillatsissimasoqarpoq, illoqarfillu matoqqalluni.
AAMMA ATUARUK Pisisartut imigassamik matusinermut: Kingunerlutsitsisoqarsinnaavoq, eqqissiviilliortoqalissaaq - isumatusaarneruvorlu
Pissutsit maanna allaapput. Tunillatsissimasut aqqanillit tamarmik maanna peqqisseqqissimapput.
- Imigassanik aalakoornartortalinnik nioqquteqartarneq imigassartortitsinermullu inerteqquteqarneq sivitsorneqarnavianngilaq, Kim Kielsen allappoq.
- Piffissami nukingernartumi nuna tamakkerlugu inuiaqatigiinni misiginneqatiginninnermik angisuumik takutitsisoqarpoq. Inassutit peqqussutillu innuttaasunit tigulluarneqarput - naak ilaat misigissuserpassuarnik pilersitsigaluartut. Innuttaasut pissusilersorluarsimanerannut qujassuteqarniarpunga annertuumik.