Pisisartut imigassamik matusinermut: Kingunerlutsitsisoqarsinnaavoq, eqqissiviilliortoqalissaaq - isumatusaarneruvorlu

Nuummi nunaqarfiinilu imigassaarniarneq arfininngormat unnukkut arfineq-pingasunngoqqammersoq matuneqarpoq. Coronavirusip tuniluutinnginnissaa siuneqartaralugu Naalakkersuisut siulittaasuat taama aalajangerpoq. Politiimmi angerlarsimaffinni ernguttoqartartoq naammattoortarpaat, naak peqqussutaagaluartoq ataatsimoornerit inuit qulit amerlanerpaaffigissagaat, taamatullu immitsinnut qanillivallaaqusaanngitsugut.

Imigassaarniarsinnaajunnaartitsineq Kim Kielsenip oqarnera naapertorlugu "meeqqat illersornissaannik" siunertaqarpoq.

Inuit naapitat Nuup ilaani Qinngorpumi taamatut aalajangerneq qanoq isumaqarfigaat? KNR-imit akissutissarsiniarparput.

Jonas Reimer:

-  Ajorinngilara, nappaassuaq ulorianartigisoq. Angerlarsimaffimmilu eqqissiviilliornerit pinaveersaartinniarlugit meeqqallu illersorniarlugit killilersuisoqarmat. Tamattami pisussaaffigaarput nualluutip tuniluutinnginnissaa.

Juliane S. Poulsen:

- Pipallataavallaarpoq. Atuisuunngikkaluarlunga siumoortumik nalunaarutigisimasinnaagaluaraat isumaqarpunga. 

- Facebookikkut paasillugu tupannarpoq. Atornerluisut eqqarsaatigissagaanni taakku pinngitsuuisinnaanngillat, imerunnaariasaarnermilu kingunerlutsitsilissagaluarunik spritip imernissaa ersigiunnaarsinnaavaat. Taamaaliortoqalissappallu taakkununnga ulorianarsinnaavoq.

Natasja Hagemann:

- Silatusaarnerusoq isumaqarpunga. Neriuutigaarali imigassamik atornerluisut eqqarsaatigisimassagaat (Naalakkersuisut aaqq.). Taakkumi ikiorneqartariaqalissapput, imerunnaariasaarnerullu kingunerisaanik kingunerlutsitsilissagunik avatangiisaannut tuttussaavoq. Meeqqattaaq ikiorneqarnissaannut neriuppunga periarfissaqassasoq. Taakku eqqasuutigaakka.