Nuummi mittarfiup tallilerneqarnissaanut qaartitsineq siulleq
Sanaartornermi taama angitigisumi misissueqqaarnissaq pisariaqarpoq, tamatumunngalu atatillugu qaartitsinerit siulliit nalunaaqutaq marlunut pissapput, Naalakkersuisut tusagassiorfinnut nalunaaruteqarlutik taama allapput.
Qaqortumi Ilulissanilu qaartitsisoqareerpoq, attaveqaqatigiinnermullu naalakkersuisup sanaartornerit aallartinneqarnissaat qilanaarinerarpai.
- Kalaallit Airports A/S-ip suliamik nangitsinera, attaveqaatillu nunatsinnik ataqatigiissitsinerusut piviusunngortinnissaannut alloriarnerit kingulliit tungaannut aallartinnera takusinnaagakku nuannaarutigaara, Martha Lund Olsen tusagassiorfinnut nalunaarummi taama oqarpoq.
Qaartiterinermi qaarsup 6 millionit kvadratmeterip missaanniittup piiarneqarnissaa naatsorsuutigineqarpoq, tamannalu Maniitsup mittarfiata sanaartorneqarnerani piiarneqartut quleriaataanniit aqqaneq marloriaataannut annertussuseqarpoq.