Nutarterneqarpoq: Nuummi mittarfimmiittut aniatitaasut
Ilanngutassiaq Greenland Airportsimit, Kalaallit Nunaanni Politiinit, Air Greenlandimiillu paasissutissartalerlugu nalunaaqutaq 15.00 nutarterneqarpoq.
Nuummi mittarfimmiittut aniatitaapput.
Greenland Airportsip attaveqatigiinnermut pisortaa, Mikkel Bjarnø Lund paasissutissiivoq.
- Nakkutilliisugut pasinartumik nassaarput. Taamaammat sulisut periusissiaq malitassartik malillugu – mittarfimmiittut aniatippaat, Mikkel Bjarnø Lund oqarpoq.
- Aniatitsineq periuserineqartussaq malillugu pivoq.
Tassanngaanniillu Kalaallit Nunaanni Politiit suliamik nangitsillutik.
Mittarfimmi pasinartumik nassaartoqarsimanera, taamaammallu pisariaqartumik misissuisoqarnerani inuit aniatinneqartut, Kalaallit Nunaanni Politiit KNR-imut uppernarsarpaat.
Taakkuli maannakkut allamik oqaasissaqanngillat.
Innuttaasut qanillittunnginnissaat politiillu assersuinerannik ataqqinninnissaat politiit kaammattuutigaat.
Air Greenlandip oqarnera naapertorlugu timmisartuussinissat tamarmik nalunaaqutaq siusinnerpaamik arfernup tungaanut kinguartinneqarput. Tamanna attaveqatigiinnermut pisortap, Inga G. Markussenip paasissutissiissutigaa.
- Maannakkumut timmisartuussisoqarallassannginneranik isumaqarpoq. Timmisartuussinissat nalunaaqutaq 18-ip tungaanut taamaatinneqarput.
Isiginnittut
Timmisartumut ilaasussat aniatinneqartut biilit unittarfiannut 350 meterisut ungasitsigisumukartinneqarput.
KNR-ip timmisartumut Københavniliartumut ilaasussaagaluartoq takunnittorlu, Hans Jukku Noahsen attaveqarfigaa.
Taassuma inuppassuit allat ilagalugit mittarfik qimaamiaqqavaat,
- Susoqarnera naluara. Sulisut aniaqqulluta mittarfik qimaqquaat. Naluara susoqarnersoq, taanna oqarpoq.
KNR-ip pisunik ilisimaasqarneruleraangami ilanngutassiaq ingerlaavartumik nutartertassavaa.
