Nuummi Kalaaliaratoqaq isateriarlugu nutaaliortoqalersoq
Nuummi Kalaaliaratoqaq 1958-imi sananeqartoq aserfallassimavoq, taamaattumillu isaterneqartussanngorpoq nutaamillu Kalaaliaraliortoqarluni.
- Aserfallassimanersuatajuna kingunerisaanik taamatut isikkoqalernera massakkut uagut soorunami iliuuseqarfigigipput, Agnes Olsen, Kommuneqarfik Sermersuumi sanaartornermut avatangiisinullu ingerlatsivimmeersoq oqarpoq.
Nuutoqqami Kalaaliaratoqaq 1958-imi sananeqarpoq, taamanilu Danmarkimi illoqannginnersani pisiniarfiit isumassarsiorfigalugit aalisakkanik, neqinik neqaarniallu tunisassiaanni allanik tuniniaaffissatut siunertaqarsimalluni.
Kalaaliaraq nutaaq Nuup illoqarfiata qeqqani 2010-mi Kommuneqarfik Sermersuumit ammarneqarpoq. Kalaalimineerniarfilli iluatsitsiffiunngilaq, iseraannimi sulisui pisinianit tuniniakkanillu amerlanerukkajuttarput.
Ukiunilu arfinilinni ukiumoortumik millionilikkuutaanik amigartooruteqarfiusareersoq, kalaalimineerniarfiup illutaa tuniniarniarlugu kommunip 2016-imi aalajangiuppaa, kalaalimineerniarfiullu nutaaliaanerusunngorlugu Nuutoqqamut uterterteqqinnissaa siunniunneqarluni.
AAMMA ATUARUK Nutaanik malittarisassaqalernera imminut pilersorsinnaanitsinnut iluaqutaassaaq
Kalaaliaqqap nutaap aappaagu apriilip qaammataata naalernerani ammarsinnaanissaa kommunip naatsorsuutigaa, tamatumunngalu peqatigitillugu ilisimatitsissutigaa Kalaaliaraq (illoqarfiup qeqqaniittoq) nutaap ammarnissaata tungaanut ammatinneqassasoq.
Kommuneqarfik Sermersuumi suliniutit pillugit siunnersortip, Ivan Falck Petersenip, oqaatigaa ingerlatsineq pitsaanerulersinniarlugu kalaalimineerniarfiit marluusut ataatsimuulersinneqassasut:
AAMMA ATUARUK Panertut tarajortikkallu kalaalimineerniarfinni tuniniarneqarsinnaalersut
- Massakkut immikkooqqanerat, Kalaaliaqqatoqqami pisat suliarineqarneri, taavalu Kalaaliaqqami nutaami tuniniarneqarnissaat ajornakusoornikuugami. Taannalu iluatsinnerusumik ingerlanniarlugu ataatsimuulernissaat kissaatigineqarnikuuvoq taavalu aamma akuerineqarluni, Ivan Falck Petersen oqarpoq.
Ilanngullugulu oqaatigaa aserfallatsaaliinermut tunngasut kommunip isumagissagai, uumasulerinermullu tunngasunik nakkutilliinerit Namminersorlutik Oqartussanit isumagineqassasut.
Nuutoqqami avatangiisit ataqqillugit nutaamik kalaaliaraliortoqassaaq
Nuutoqqami Kalaaliaraq nutaaq pioreersoq tunngavigalugu sananeqassaaq, Nuutoqqamilu illut qalipaataannut naapertuuttumik aamma qalipaateqartinneqassalluni. Aammattaaq eqqiluisaarnissaq immikkut isiginiarlugu atortulersorneqassaaq:
AAMMA ATUARUK Nuummi Kalaaliaqqap amigartooruterpassuani ajornartorsiutigai
- Atortorissaarutinik pisariaqartinneqartunik pilersorneqassaaq, soorlu assersuutigiinnarlugit, taava qulakkeeriissavagut atuisartut assatik errorsinnaassagaat, imermik imerneqarsinnaasumik naammattumik pilersorneqassasoq, anartarfiit takananiittut aamma, perusuersartarfiit immikkut inissisimanissaat, tamaviisa qulakkeereernikuupput, Agnes Olsen oqarpoq.
Nuutoqqami Kalaaliaratoqaq 1958-imi sananeqarpoq, taamanilu Danmarkimi illoqannginnersani pisiniarfiit isumassarsiorfigalugit aalisakkanik, neqinik neqaarniallu tunisassiaanni allanik tuniniaaffissatut siunertaqarsimalluni.
AAMMA ATUARUK Nuummi kalaalimineerniarfittaaq Sermersuup tuninialeraa