Nuummi Kalaaliaqqap amigartooruterpassuani ajornartorsiutigai

Kommuni illumut ukiumut 3 millionit koruunit missaannik amigartooruteqartarami, taanna tunerusulersimavaa. Kalaaliararlu nutaamik nutaaliatullu nuutoqqami ammaqqinniarlugu:

Kalaaliaraq alakkarteratsigu pisiniarfimmi sulisut pisiniartunit amerlanerupput.

Aamma atuaruk Nuummi kalaalimineerniarfittaaq Sermersuup tuninialeraa

Kalaaliaqqap ammarneraniilli amigartooruteqarfiuvoq

Sulisut qulingiluat, aalisartut piniartullu pisaannik suliaqartartut, aningaasarsiassaasa qaavatigut aamma soorlu imeq, innaallagiaq, kiassarneq, oqarasuaatit angallattakkat, uulia biilillu aningaasartuutaasartut, nalunaarsuiffimmi takuneqarsinnaapput.

Kalaaliaqqamik ingerlatsinermi aningaasartuutit 65 procentii akissarsianut tuttartut, sanarfinermut avatangiisinullu ingerlatsivimmi pisortaq Frank Rasmussen oqarpoq. 

- Uagutsinnut akissaajaataasorujussuuvoq. Taamatut ingerlatsiinnarnissarput uagutsinnut akileraartartunulluunniit illersorsinnaanngilarput, ingerlatsivimmi pisortaq oqarpoq.  

Kalaaliaraq nutaaq ukiumut 5 millionit koruunit nalinginut tunisaqartarpoq. Ullormut 1000 koruuninit 70.000 koruuninut  nikerartumik isertitaqartarpoq. 

Kommuni aalisartunut piniartunullu tunisaqarsimasunut sapaatip-akunneranut marloriarluni akiliisarpoq, akiliutiminilli 10-12 procentit akileraartunut nakkartussat, aamma 10 procentit allat, ingerlatsinermut akiliutissat ilanngaatigeqqaartarlugit.

- Kalaaliaqqami tunineqartut nalingisa 10 procentii pissarsiarisarpagut. Tassa ukiumut millionip affaa, taakkuli isertitatut ilanngukkaluarutsigilluunniit suli 2,5 aamma 3 millionit koruunit akornanni amigartoorutigisarpagut.

Politikerit Kalaaliaqqap tuninissaa maanna akueraat. Sisimiunilu kalaalimineerniarfimmut assingusumik Nuutoqqami nutaaqqinnaamik illuliuunniarlugu, kisianni Nuutoqqamiittup allanngutsaaliugaanera innarlernagu, Frank Rasmussen oqarpoq.

- Kalaaliaqqamik akikinnerusumik, pisisartuniillu ornigarneqarluartumik ingerlatsisinnaassasugut ilimagaara, kalaaliaqqamimmi ingerlatsineq ataatsimoortikkaanni taava pisanik suliarinninneq tuniniaanerlu sumiiffimmi ataatsimoortinneqarsinnaapput. 

Kalaaliararlu taamaattoq 3 millionit koruuninik ullumikkut aningaasartuutigisatsinnit millioninik marlussunnik kommunimut sipaaruteqartitsisinnaavoq.

- Taamaaliornikkullu iluatsitsilluassalluta isumaqarpunga.

Allalli siunissami kalaaliaqqamik ingerlatsisinnaanissaat Kommuneqarfik Sermersuup aamma periarfissaatippaa.