Igasoq: Nutaanik malittarisassaqalernera imminut pilersorsinnaanitsinnut iluaqutaassaaq

Inuussutissat suliarineqarsimasut ilaat kalaalimineerniarfinni pisiarineqarsinnaalernissaannut immikkut akuersissuteqarneq septembarip aallaqqaataanit atuutilerpoq.

Tassalu aalisakkat neqillu panertut, qerisut, tarajortikkat pujuukkallu tuniniarneqarsinnaanngorput.

Inunnguaq Hegelundillu neriniartarfimmik Kalaaliaraq ukioq manna maajimi ammaasup nunattalu kujataani nerisassat pillugit festivali Igasa Food Festivalimik aaqqissueqataasup kalaalimernit Nunatsinni pissarsiariuminarnerunissaat ujartortuarpaa.

AAMMA ATUARUK Panertut tarajortikkallu kalaalimineerniarfinni tuniniarneqarsinnaalersut

Kalaalimernillu assersuutigalugu kalaaliaqqani sapernannginnerusumik nioqqutigineqarsinnaalernerat, taassuma nuannaarutigaa:

- Ajunngitsorujussuuvoq, kisianni suli dispensationiuinnaavoq. Inatsisinngortariaqarpoq, aamma nerisassat tungaatigut inatsit allannguittariaqarpoq, nunatsinni kulturimut naleqqussarnerulersillugu. Unali aallartissutitut ajunngitsorujussuuvoq, kisiani suli sukataarutissaqarpugut, Inunnguaq Hegelund taama oqarpoq.

AAMMA ATUARUK Nerisassat nunatsinneersut nerisassat pillugit festivalimi sammineqassasut

Kalaalimernillu ajornannginnerusumik ulluinnarni pissarsiarineqarsinnaalernissaannut naalakkersuisut ammaassinerat nuannaarutigigaluarlugu assersuutigalugu pisiniarfinni piffissaq ungasinnerusoq eqqarsaatigalugu aamma pisariinnerulersinnaanissaat Inunnguaq Hegelundip sulissutigitikkusuppaa:

- Assigiinngitsunik iliuuseqartariaqarpugut, inatsilli una aaqqikkallarmassuk aallartissutitut ajunngitsorujussuuvoq, suliassalli suli amerlaqaat. Soorlu pisiniarfinni tuniniaasinnaanissaq assigiinngitsullu taakku suli sukataarutigisussaavavut, Igasoq Inunnguaq Hegelund taama oqarpoq.

AAMMA ATUARUK Kalaalimerngit utoqqaat inuuneranni naleqartitsisut