Kalaalimerngit utoqqaat inuuneranni naleqartitsisut

Utoqqaat inuunerminni kalaalimerngit, pinngortitaq eqeersimaartumillu inuuneqarneq naleqartutut pingaartippaat. Ilisimatuussutsikkut misissuinerup Arktisk Aldringimik ateqartup tamanna erseqqissarpaa.

Inuiaqatigiinni utoqqartagut qanoq isiginerigut taakkulu imminnut qanoq isiginersut ilisimatuutut misissuinerup Arktisk Aldringip apeqqutitut tunngavigisaasa ilagaat. Misissuineq ukiuni sisamani suliarineqarpoq paasisallu katersorneqartut sapaatip akunnerani matumani takussutissiarineqarput.

Projektleder Tenna Jensen Foto: Laura Loop 

Ilisimatuutut misissuineq nunatta avannaani, kujataani kiisalu Nuummi maannamut ingerlanneqarpoq. Utoqqaat kommunillu apersorneqarnerat misissueqqissaarnerup ingerlanerani ingerlaannassapput.

- Sammisat ilaat inuit eqqartugaat, tassa kalaaliminissaqarnissaq, pinngortitamukarsinnaanissaq aammalu utoqqaligaluarluniluunniit eqeersimaartumik inuuneqarneq, tamatullu inunnut allanut, ilaquttanut ikinngutinullu attaveqarnissaq pingaaruteqartorujussuupput.

Københavnip Universitetiata Peqqissutsimik ilisimatusarfiani Center for Humanistisk Sundhedsforskning-imi lektori, Tenna Jensen, oqarpoq. Taassuma kalaaliminissaqarnissaq utoqqarnut pingaartumik isumaqartorujussuusoq nassuiaatigaa.

- Utoqqaat oqaatigaat peqqinnerulersitsisartut nukittunerulersitsisartullu taamaammat peqqissutut eqeersimaartumillu misiginissamut kalaaliminertornissaq pingaaruteqartut ilagaat.

Ukkatarineqassaaq paasissutissaqassallunilu

Nunat allat assigalugit nunatsinni utoqqaat siunissami amerlanerulissapput, tamannalu inuiaqatigiittut qanoq aqussinnaassaneripput inituvoq. Taamaammat tamanna pillugu ilisimasaqarnissaq Tenna Jensenip pingaartuusoraa.

- Nunatsinni utoqqaliartorneq siusinnerusukkut sammineqarnikuunngilaq, taamaammat ilisimatusaatigalugu suliniuteqarpugut, sammisamummi paasissutissarsisinnaassallutalu ukkatarinnilersitserusuppugut.

Sammisamut tassunga susassaqartut politikerit qaffasinnerusullu nunatsinni utoqqaat inuunerissaarnissaannik pilersitsinissamik suliaqarneranni atorneqarsinnaasumik paasissutissaataasiviliornissaq anguniagaasoq, pilersaarusiornermi aqutsisoq oqarpoq.

- Utoqqat inuunerat utoqqaallu imminnut qanoq isumaqarfiginerat kiisalu peqqissusaat pillugu paasissutissarsisinnaanissarput tamatumalu pisariaqartinneqarfiani saqqummiussinnaanissaa neriuutigaara.

Nuummi Ilisimatusarfimmi tamanut ammasumik pingasunngornermi unnukkut nalunaaqutaq 19.30-miit 21.00-imut ilisimatusaatigalugu pilersaarusiaq pillugu oqalugiartoqassaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl