Nuummi eqqumiitsuliortut suliffigiutigalugu najugaqarfissaat pilerngukkaat
Qinnuteqartunik toqqaallutik aalajangiisuusussat tassaapput NAPA, Nuummi Eqqumiitsulianik Saqqummersitsivik aamma eqqumiitsuliortoq Ivínguak Stork Høegh, nunani avannarlernit qinnuteqartut 72-it akornanni ataaseq toqqarsimalerpaat, tassaasussaq siullersaalluni Nuummi Eqqumiitsulianik Saqqummersitsvimmi najugaqaqqaartussaq.
Taannalu tassaavoq Marte Lill Somby. Nuummi Eqqumiitsulianik Saqqummersitsivik tusagassiorfinnut taama nalunaaruteqarpoq
Marte Lill Somby Norgep ilaani Saamit Nunaanneersuuvoq, Tromsømi Academy of Contemporary Artsimi eqqumiitsuliortutut ilinniarsimasuusoq. Atortussiat assigiinngitsut atorlugit eqqumiitsuliortartuuvoq, soorlu qisuit, siilikimik naqitat, titartakkat, isiginnaagassiaaqqat, assilisat aamma inimi saqqummersitsivimmi isersimaffimmi pinnersaaneq eqqumiitsulioriaatsitut ingerlallugu.
Marte Karasjokimi Tromsømilu Norgemi peroriartorpoq. Nuummiinnermini katersugaasivimmi najugaqarnermini takorloorpaa kissaatigalugulu kalaallit saamillu kinaassusaannik ataatsimoorussaannillu aallavilimmik suleriuseqarniarluni.
Aamma atuaruk Nuummi eqqumiitsuliortut inaannik peqalersoq
Nunani Avannarlerniik qinnuteqaatit 70-it sinnillit
Ataatsimiititaliaq toqqaasussaq 65-inik qinnuteqartunit nunani avannarlerni nunanit arfineq-marlunniit aamma nunani baltiskiusunit (Norge, Danmark, Sverige, Finland, Island, Letland Lithauenilu) saniatigut qinnuteqaatit arfineq-marluk Ungarnimit, Tuluit Nunaannit, Skotlandimit, Frankrigimit, Canadamiit Filippiineriniillu.
- Arlalitsigut Kalaallit Nunaat nunaavoq imaaliallaannaq tikinneqarsinnaanngitsoq, inukitsoq isorartoorlu. Orninnera akisusarpoq aamma Kalaallit-Nunaanni najugassarsiorniarneq imaannaanani. Uku sinaakkuttat eqqumiitsuliortunut arlariinnut periarfissiisussaapput, nunap eqqumiitsuliortuinik attaveqarsinnaanngorlutik, ilinniartunik inuinnarnilluunniimmi eqqumiitsuliornermik piorsarsimassutsikkullu soqutigisalinnik naapitsinissamut aammaassisuusussaavoq, taamaalilluni suleqatigiilluni pilersitseqatigiinnissamut aamma periarfissanik ammaassisuussalluni, Nuummi eqqumiitsualinik Saqqummersitsivimmi pisortaq Nivi Chistensen oqarpoq.
