Nuummi eqqumiitsuliortut inaannik peqalersoq
Eqqumiitsuliortunut nunanit avannarlerneersunut ukiumoortumik sisamanik stipendiaqartitsinikkut aammalu Nuup illoqarfiata qiterpassuani inimik ataatsimoorussamik sulliveqartitsinikkut kalaallit nunanilu avannarlerni eqqumiitsuliortut pitsaanerusumik suleqatigiinnissaat aqqutissiuunniarneqarpoq. Nuummi Eqqumiitsulianik Saqqummersitsivik nittartakkamini taama allaaserisaqarpoq.
Eqqumiitsuliortut inissaannik pilersitsisut tassaapput Nuummi Eqqumiitsulianik Saqqummersitsivik aamma Nunani Avannarlerni Piorsarsimassutsikkut Attaveqaat, NAPA. Taakku Kulturkontakt Nordimit tapiiffigineqarnermikkut eqqumiitsuliortunut ukiumoortumik sisamariarlutik ineqartitsisinnaalerput, eqqumiitsuliortullu inissiami nutaami inini 8 kvadratmeterisut angitigisuni marlunni najugaqartassapput.
Nuummi Eqqumiitsulianik Saqqummersitsivik naapertorlugu eqqumiitsuliortut nunanit avannarlerneersut taamaalillutik Nunatsinni piffissami sivisunerusumi najugaqarsinnaalissapput, tamannalu najukkami eqqumiitsuliortut, ilinniagaqartut innuttaasullu eqqumiitsuliornermik kulturimillu soqutigisaqartut akornanni suleqatigiinnissamut periarfissanik pitsanngorsaanissamik siunertaqarpoq.
Eqqumiitsuliortut inaat pisatsersukkanik marlunnik initaqarpoq, igaffeeraqarluni, uffarfeqarpoq ineqarluni sullivimmik ataatsimoorussassamik. Nuummi Eqqumiitsulianik Saqqummersitsiviup, Nunani Avannarlerni Piorsarsimassutsikkut Attaveqaatip aamma eqqumiitsuliortup toqqakkap qinnuteqartut akornanni kikkut Nuummi ineqartinneqartassanersut aalajangertassavaat.
Qaammatini marlunni najugaqartoqarsinnaassaaq, eqqumiitsuliortullu najukkami sammisaqartitsisassapput, soorlu tusarnaartitsillutik, saqqummersitsillutik imaluunniit ilinniartitsillutik.
Suliniut 2017-imi aasap tungaanut aningaasalersugaagallarpoq.
