Nuummi aqqusineq nutaaq: Borgmester Anniitap Aqquserna
Qinngutsinnut Qinngutsinniillu aqqusineq nutaaq ”Borgmester Anniitap Aqquserna”-nik atserneqassasoq aningaasaqarnermut ataatsimiititaliap sapaatip akunnerani kingullermi isumaqatigiilluinnarlutik akuersissutigaat, taaguutissaatalu kommunalbestyrelsimit ullumi akuersissutigineqarnissaa innersuussutigalugu.
Nuup Kommuniata nittartagaani taama allaaserinnittoqarpoq.
Nuummi borgmesteriugaluup Agnethe Davidsenip aqqusinermut atsiunneqarnissaa Siumup ukioq januaarimi siunnersuutigimmaguli siunnersuutit pingasut oqallisigineqareerput.
”Anniitap Aqquserna” siullertut siunnersuutigineqarpoq, tulliatut siunnersuutigineqarpoq ”Agnethe Davidsen-ip Aqqusernga”, Ove Karl Berthelsenillu Inuit Ataqatigiinneersup kingulliulluni siunnersuutigaa ”Borgmester Anniitap Aqquserna”-nik atserneqassasoq.
Aningaasaqarnermullu ataatsimiititaliap isumaqatigiilluinnarluni sapaatip akunnerani kingullermi tassa taanna akuersissutigaat, kommunalbestyrelsillu ullumi akuersissutigissallugu, ”Borgmester Anniitap Aqquserna” arfininngorpat oktobarip ulluisa sisamaanni ammarneqassaaq.
