Nuummi angerlarsimaffeqanngitsut inissaannik tupeqarfimmik naappaasoqarpoq
Tuperni napparneqartuni kiassakani angerlarsimaffeqanngitsut uffarsinnaallutillu errorsisinnaapput.
Tupeqarfik ajornatoornermi atugassatut pilersinneqarpoq.
Angerlarsimaffeqanngitsut Nuummi ornissinnaasaat tamarmik matoqqapput.
Kofoed Skole, Frelsens Hæri, Nunatta atuagaateqarfia aamma Katuaq matoqqapput
Tupeqarfik angerlarsimaffeqanngitsut najugaqarfigigallagaat, Nuuk Imerup eqqaanipput,
nunaminertami annertujaami siammarnerunissaat, tassuunalu Covid-19-ip atuunnerani tunillanneqarsinnaanerannut illersorniarlugit taamaaliortoqartoq, kommune nittartakkamini taama allappoq.
Kommuneqarfik Sermersuumi borgmesterip Charlotte Ludvigsenip angerlarsimaffeqanngitsunut tupeqarfiliorneq nuannaarutigaa:
- Tupeqarfik maanna atorneqarsinnaalermat eqqissiallaqaanga. Angerlarsimaffeqanngitsunut toqqissiallaataanissaa illersorneqartutullu misiginissaat pingaarnerpaavoq, malugisinnaavaralu taamatut misigisut. Takkukkatta ilassiartorlugit illarpalaarnerat nuannaarnerallu malunnarpoq. Taakku sinnerlugit nuannaaqaanga”, Charlotte Ludvigsen taama oqarpoq.
Tupeqarfiup ammarnersiorneqarnerani borgmesteri angerlarsimaffeqanngitsut ilassiartorpai,
piffissami assammissinnaananilu eqitaarsinnaanngiffiunngitsumi assigiinngitsutigut ilassiortoqarlunilu aalaterisoqarpoq, ilaatigut ”kamippannik ilasseriaaseq” atorneqarluni.
Angerlarsimaffeqanngitsut 26-it tupeqarfimmut tallimanngormat inissinneqarput. Tupeqarfik angerlarsimaffeqanngitsunut 80-nut inissaqarpoq.