Nuummi Angajoqqaarsiat Peqatigiiffiat akerliussutsimik takutitsilerpoq

Nuummi Angajoqqaarsiat Peqatigiiffiat Inatsisartut upernaakkut katersuunnerannut atatillugu akerliussutsimik tallimanngorpat takutitsiniarput.

Peqatigiiffimmi ilaasortat – allallu soqutiginnittut – Ilaqutariinnermut Pisortaqarfiup illorsuartaata eqqaaniit Inatsisartut ataatsimiittarfiata tungaanut nalunaaqutaq pingasup qeqqa, 14.30, ingerlaaqatigiinniarput, tamaanilu oqalugiaqattaartoqassaaq.

Peqatigiiffimmi ilaasortaasut soqutiginnittullu akerliussutsimik takutitsinermikkut angajoqqaarsianut atugassarititaasut politikerinut

maluginiaqquniarpaat – minnerunngitsumillu meeqqat inuusuttuaqqallu sumiginnakkat ajornartorsiutinngortikkiartuaarneqartut maluginiarneqarnissaat oqariartuutigissallugu.

- Meeqqat inuusuttuaqqallu sumiginnakkat pisinnaatitaaffiisa pingaartinneqarnissaat oqariartuutigineqassapput, qinikkammi tamakkuninnga pingaartitsinerusariaqarput, tusagassiutinut nalunaarummi peqatigiiffik taama allagaqarpoq.

Tamatuma saniatigut maluginiaqquneqarpoq angajoqqaarsianik pikkorissunik pisariaqartitsineq – peqatigiiffiup politikerinut tamanna qangalili kissaatigiuartarsimammagu.