Nuummi angajoqqaarsiat atsiornernik tunniussipput

Nuummi angajoqqaarsiat peqatigiiffiata atsiornerit 562-it ilaqutariinnermut naalakkersuisoqarfimmut ippassaq tunniuppai.

Angajoqqaarsiat peqatigiiffiata piumasaraa, angajoqqaarsiaasinnaanermut ukiut killigitinneqartut 25-nik ukioqalereersimasunut killilerneqassasut. Atsiortitsineq aallartinneqarpoq niviarsiaraq angajoqqaarsiamini inuusuttuniitilluni toqummat, toquneralu toqutsinertut misissuiffigineqalermat.

Naalakkersuisut ukiut killigitinneqartut allanngortinnissaat siusinnerusukkut itigartitsissutigereerpaat, tamatumani tunngavilersuutigineqarluni tamanna ilaqutaasut angajoqqaarsianngortinneqartarnerannut ajornartorsiortitsilissasoq. Taamaattorli Nuummi angajoqqaarsiat peqatigiiffiata siunnersuutigaa, ilaquttanut inissiisarneq inatsisiliornermi ilanngunneqassanngitsoq.

Tamatumunnga peqatigitillugu isumaginninnermut aningaasaliissutit amerlineqarnissaat Nuummi angajoqqarsiat piumasaraat.