Nuuk International Film Festival pingasunngorpat aallartissasoq
- Nuuk International Film Festival sisamassaat Katuaq suleqatigalugu septembarip 16-ianit 19-ianut ingerlanneqalerpat filmigassarpassuaqarpoq, aaqqissuisut tusagassiuutinut nalunaarummi allapput.
Filmfestivaleqarnissaanut pilersaarummi 76-inik qupperneqartumi kalaallit nunanillu tamalaanit filmiliat Katuami sapaatini-akunnerni aggersuni aallakaatinneqassapput.
Nuuk International Film Festivalip filmi nutaaq, canadamiumit isiginnaagassiamik ilitsersuisartumit, Zacharias Kunummit ilitsersorneqartoq ilaatigut takutissavaa. Taassuma isiginnaagassiaa ”One Day in the Life of Noah Piugattuk”-mik ateqarpoq.
Zacharias Kunuup filmiliaqqaaminik ”Atanarjuat – The Fast Runner”-imik ilisimaneqarlualerpoq, taanna Cannesimi filmfestivalertoqarmat Det Gyldne Kameramik akissarsitinneqarpoq.
Katuami takuteqqaarneqartussat
Kalaallit isiginnaagassiaat qassiiusut festivalertoqarnerani aamma takuteqqaarneqassapput.
Nivi Pedersenip isiginnaagassiaa naatsuliaq ”Updated” aamma Anders Berthelsenip Blok 5-imi qaartoortoqarnera pillugu piviusulersaarusiaa ilaatigut takuteqqaarneqassapput.
Festivalertoqarnerata naggaserneqarnerani aamma akissarsititsisoqassaaq:
- Festivali naggaserlugu arfininngorpat unnukkut akissarsiassanik agguaasoqassaaq, natsuliani pitsaanersaq, isiginnaagassiani takisuuliani pitsaanersaq, taamaaqaataanillu FILM.GL filmiliornermi peqatigiiffiup ukiumi akissarsiaritittagaa Innersuaq, NIFF tusagassiuutinut nalunaarummi allappoq.
Nunanit tamalaanit video aqqutigalugu peqataasoqassasoq
Naalli ulluni makkunani corona pissutigalugu killilersuisoqaraluartoq aaqqissuussisut festivalimik ingerlatsisinnaanertik nuannaarutigaat.
- Taamaammat nuannaarutigeqaarput filmfestivali ingerlanneqassammat filminilllu isiginnaartitsisinnaagatta, festivalimi aqutsisoq, Pipaluk K. Jøregsen oqarpoq, nangillunilu:
- Tikeraartut nunani tamalaaneersut nappaassuaq pissutigalugu tikisinnaanngitsut videolink atorlugu peqataatitsisoqassaaq, ilaatigut peqataassalluni canadamiu ilitsersuisartoq Zacharias Kunuk aamma Bird Runningwater Sundance-meersoq, Nuummut tikilluaritsi.
Nuuk International Film Festivalimi aaqqissuussinerit tamarmik Katuami ingerlanneqassapput.
Filmfestivalimut isissutissat tuniniarneqalereerput, Katuallu saaffiginnittarfiani pisiarineqarsinnaallutik. Isissutissaq inersimasumut 40 koruuneqarpoq meeqqanullu 20 koruuneqarluni.
