Nuuk innaallagiaaruttoq - Nuummi innaallagissamik maanna pilersueqqilerput

Nuuk tamakkerluni maanna innaallagiaaruppoq, Nukissiorfiit ilisimatitsipput. Nukissiorfiit pingasunngornermi ullaap tungaani paasissutissiipput ullup qeqqata missaani innaallagiaqaleqqinnissaa naatsorsuutigineqartoq.

Allattoq Paarnannguaq Nielsen, Nicole Sander Bertelsen

juulip 15-at 2026 09:07

Nutserisoq Ivalu Thorleifsen

Kingullermik nutarterneqarpoq nal. 12.37

Nukissiorfimmiit nalunaarutigineqarpoq Nuuk tamarmi innaallagissamik pilersorneqaqqilertoq.

- Ullaap tungaani innaallagiaarunneranut pissutaavoq, sillimmatissatut innaallagissiorfimmiit innaallagiamik pilersuinerup erngup nukinganik innaallagissiorfimmut nuunneqarnerani kukkusoqarnera.

Nukissiorfiit KNR-imut mailikkut allapput.

Illoqarfiit pingaarnersaanni maanna innaallagiaqanngilaq.

Nukissiorfiit inoqatinut attaveqatigiittarfikkut facebookimi quppernerminni allapput.

Tusass aamma innaallagiaarunnera pillugu nittartakkaminni allapput:

- Innaallagiaarunneranut atatillugu oqarasuaatit angallattakkat attaviinut sunniuteqarsinnaavoq. Attaviluttooruit timmisartulernermi oqarasuaatip angallattakkap attaveerutsinnissaanut toortakkap toornissaa siunnersuutigaarput kingornalu attavinitseqqillugu. Taamaaginnassappat qameriarlugu ikeqqissinnaavat.

Innaallagiaarunneranut suna peqqutaanersoq suli ilisimaneqanngilaq.

Ajutoornermi sarfaliuutit atorneqarput

Greenland Airports Sermitsiamut allappoq, Nuummi mittarfik ajutoornermi sarfaliuutinik atuisoq naak innaallagiaarukkaluartoq ingerlatsisoqarpoq.

Nukissiorfimmiit nalunaarut kingulleq tassaavoq, akunnerit marluk qaangiuppata innaallagiaqqilernissaa naatsorsuutigineqartoq.

Nutartigaq nal. 10.52

Kalaallit Nunaanni Politiit Facebookikkut nalunaarput, ikiortissarsiortoqarpat normumut 70 14 48-mut suli sianertoqarsinnaavoq.

Nutarterneqarpoq...

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.