Nuuk illoqarfiit pingaarnersaanni takornariaqarnermi piujuartitsisut nunarsuaarmi siullersaalluni akuerisaasoq
Nuuk nunarsuarmi illoqarfiit pingaarnersaanni siullersaalluni takornariaqarnermi piujuartitsisutut akuerisaavoq.
Suliffeqarfissuup, EarthCheckip nunatsinni illoqarfiit pingaarnersaat piujuartitsisumik takornariaqarfittut nalilerpaa.
Kommuneqarfik Sermersuup EarthCheck Nuummik nammineerluni naliliisippaa, naliliinermilu immikkoortut sisamat najoqqutarineqarput: Aningaasaqarneq, avatangiisit, inunnut tunngasut aammalu kulturi.
Kommuneqarfik Sermersuumi suliniutinut aqutsisoq, Salik Hard oqarpoq.
Erngup nukinga nunaqavissunillu sulisoqarneq
Taassuma takornariaqarnermi ingerlatsinermi nunaqavissunik sulisoqarneq illoqarfiup ingerlalluarneranut pissutaasut ilagigaat erseqqissaatigaa:
- Takornariaqarnermik ingerlatsinermi nunaqavissunik sulisorpassuaqarpugut. Avatangiisinut tunngatillugu pijuartitsisutut taaneqarsinnaanissamut piumasaqaatit aamma malippagut, Salik Hard oqarpoq.
Silap pissusianut avatangiisinullu tunngatillugu imermik nukissiuuteqarnermit ataavartumik nukissiuuteqarnerput Nuummik naliliinermut ilaatigut ilaapput.
EarthCheckimiilli nalunaarusiami suli pitsanngorsarneqangaatsiarsinnaasut aamma takutinneqarput:
- Nunarsuarmi takornariarfiusinnaasuni tamanik 100 procentimik angusaqartoqanngilaq. Maani gassinik silaannarmut aniatitsinerput annertoorujussuunera ajoqutaavoq. Immikkoortuni allani tillinniartoqartarnera nakuusertoqartarneralu qaffasipput, Salik Hard oqarpoq.
Piujuartitsisumillu takornariarfissatut illoqarfiit pingaarnersaata nunarsuarmi siullersaalluni nalilerneqarnera sumut atorneqarsinnaanera apeqqutaalerpoq?
Nunatsinnut takornariaqarnerulernissaa akissutaavoq.
- Takornariarniartut piujuartitsisuunersugut apeqqutaatittaraat malugisarparput. Piujuartitsivallaanngikkutta tikikkusussanngilaatigut. Taamaammat piujuartitsisuuneq takornariaqarnermi piumasaqaatigineqaleraluttuinnarpoq, Salik Hard oqarpoq.
Takornariartitsisut pisortallu nuannaartut
Illoqarfiit pingaarnersaata piujuartitsisutut nalilerneqarnera takornariaqarnermit aningaasarsiortunut nutaarsiassatsialaavoq.
Nuuk Water Taxip pisortaa, Anders Lykke Laursen suleqatigiinni ”Green Team”-imi nammineq kajumissutsiminik suleqataasimasoq allagartartaarnermik qulakkeerinneqataasuuvoq. Taassuma allagartartaarneq nunatsinnut tamarmut sunniuteqarluarnissaa qularutiginngilaa:
- Illoqarfinni pingaarnerni piujuartitsisutut allagartartaarneq Kalaallit Nunaata takornariaqarnerata ineriartornera tupinnartoq, takornariarfissatullu pilerisaarinerput ikorfartussavai. Kalaallit Nunaat taamakkerlugu alloriarnertut isigaara, tassami massakkut piujuartitsisuni aqqutissiuisutut inissisimaleratta, Nuuk Water Taximi pisortaq oqarpoq.
- Sullitatta akornanni piujuartitsineq annerusumik soqutigineqarnera malugaara. Nunani allani tuniniaasut angalaqatigerusunneq ajorpaatigut, takussutissiisinnaanngikkutta nerinermut atortunik plastikkiusunik atuinnginnitsinnik. Taamaattumik plastikkit tamarmik atorunnaarsinnikuuagut, Anders Lykke Laursen oqarpoq.
Visit Greenland suleqatigiinni ”Green Team”-imi aamma suleqataavoq, tassannga Nuuk nunatsinni illoqarfiit sinnerinit isumassarsiorfigineqarnissaa neriuutigineqarpoq:
- Nunarsuaq tamakkerlugu takornariaqarnermi piujuartitsineq ukkatarineqarpoq, tamannalu tuniniaasut takornariallu toqqaasarnerannut sunniuteqarpoq, Visit Greenlandip pisortaa, Hjörtur Smárason oqarpoq.
Takornariartitsisut, Two Ravensip taperserpaa:
- Angalasarnitsinni oqaloqatigiinneq piujuartitsinermut tunngakkajuttarpoq, tikeraanilu ersittarpoq najugaqartunut ineriartortitsinermut taperseeqataasarneq pingaartinneqartartoq. Taamaattumik piujuartitsineq tikeraatsinnut soqutiginartuuvoq, Two Ravensimik aallarneeqataasoq takornariartitsisartorlu, Thorlak Skifte Nielsen oqarpoq.
Nuuk piujuartitsisumik ineriartortitsiinnarnersoq EarthCheckip ukiup tamaasa nakkutigisassavaa. Piujuartitsisoqaannanngippallu nunarsuarmi illoqarfiit pingaarnersaanni siullersaalluni pisortatigoortuunngitsumik allagartaq annaassallugu.
