Kim Kielsenip naalakkersuisut illersorai illuatungiliuttullu tusangiasaarlugit

Politikkikkut oqaluuserisassat Inatsisartuni siulittaasumit qanoq akuliuffigineqarsinnaatigippat?

Naalakkersuisut qineqqusaarutiminnik eqquutsitsisannginnerat illuatungiliuttut isornartorsioreeraallu, Inatsisartuni siulittaasumit Kim Kielsenimit tusagassiuutinut nalunaarummi tamanna maanna misilinneqarpoq.

Taama tusagassiuutinut nalunaaruteqarnerup Siumut Nalerarlu ernumalersippai.

Siulittaasup arlaannaanniluunniit inissisimannginnini atorlugu naalakkersuisut illersorai Partiit taakkua marluk isumaqarput.

- Taamaattumik Inatsisartuni siulittaasup pisortatigoortumik oqaaseqarnerani Naalakkersuinikkut maannakkut ingerlatsinermut akulerunneruvoq, illuatungiliuttunillu nipangersaanerulluni, Erik Jensen (S) tusagassiuutinut nalunaarummi oqarpoq.

Kim Kielsenili naatsumik isumaqarpoq, tassa naalakkersuisut tunngavissaqarluarlutik qineqqusaarutiminnik eqquutsitsisannginnerat illuatungiliuttunit paasineqartariaqartoq.

- Partiit naalakkersuisuutitaqalersut arlaannaataluunniit kissaatini tamaviisa naammassisinnaanngilai – isummat naapeqatigiissinneqartariaqarput naapeqatigiittariaqarlutillu. Tamanna aamma atuuppoq pingaartitanut, sulissutiginiarlugit qinersisartunut neriorsuutigineqarsimasunut, taanna tusagassiuutinut nalunaarummi oqarpoq.

Illuatungiliuttunit isornartorsiorneqartoq

Taamaammat illuatungiliuttut naalakkersuisunik isornartorsiuinissaannut patsisissaqanngitsut Kim Kielsen aamma isumaqarpoq.

- Qaqugukkulluunniit illuatungiliuttut (naalakkersuisuutitaqartunut ilaanngitsut) tamatuma kingorna partiit naalakkersuisuutitaqartut assigiinngitsut neriorsuutiminnik qimarratiginninnerarlugit tutsuiginannginnerarlugillu pisuutittarsinnaavaat, Kim Kielsen oqarpoq:

- Partiinut naalakkersuisuutitaqalersunut illuatungiliuttut neriorsuutinik eqquutsitsinnginneraaneri naleqqutinngitsutut paasiuminartutulli isikkoqarsinnaapput. Pissaanermilli tigusaqarnertik – killiliussat tamatuma malitsigisai tamaasa ilanngullugit - partiit taakkua tuppallersaatigiinnartariaqarpaat [...].

Umiarsuup naalagaata aqqutissani iluliaqaraluartoq aalajangiusimalluni ingerlaannarniaruni qanoq sianiilliornerutigissanersoq Inatsisartut siulittaasuata naggasiutigaa.

Siulittaasumit oqaatigineqartut Naleqqameersumit Jens Napãtômit illuatungilipallanneqarput.

- Inatsisartut Siulittaasuata, Kim Kielsenip, illua tungiliuttut sulinera Naalakkersuisullu ingerlatsinerat pillugit tamanut saqqummiussaa tupigusungaarlunga atuarpara, tassami Inatsisartut siulittaasuat politikkertussaanngilaq politikkip imarisaanik nalilersuisussaatitaasanngilaq, Jens NapãtoK tusagassiuutinut nalunaarummini oqarpoq.

Kim Kielsen Inatsisartut siulittaasuattut politikkimi oqallinnermut akuliutissalluni suliassarinngikkaa taanna isumaqarpoq.

- Maannakkut Inatsisartut siulittaasoqarfianniit periusiunneqartalersoq ernumassutissaavoq, tassa Inatsisartut Siulittaasoqarfiat annertunerujartuinnartumik politikkikkut oqallinnermut peqataasalermat aammalu Naalakkersuisunik tamanut ammasumik illersuisutut inissisimalermat, Jens NapãtoK oqarpoq:

- Ukiuni amerlasuuni Kalaallit Nunaanni politikkimik malinnaallutalu peqataasimasugut, maanna periusaalersoq takusimanngilarput demokratiimik ingerlatsinermi, tassalu Inatsisartut Siulittaasoqarfiat taamatut annertutigisumik naalakkersuisooqatigiit politikkikkut illersorlugit saqqummiussaqartalernera tupaallannarpoq.

Siulittaasoqarfik arlaannaanulluunniit attuumassuteqassanngitsoq

Inatsisartut nittartagaanni allaqqasoq naapertorlugu Inatsisartuni ilaasortat naalakkersuisullu suleqatigiilluarnissaat siulittaasup suliassaraa.

- Atuuffimmi tassani nalinginnaasumik ataatsimiinnerit immikkoortitsiviunngitsumik aqussallugit, Inatsisartut tamakkerlugit, tassalu naalakkersuisooqatigiit aamma illuatungiliuttut sinnerlugit sinniisuussalluni, pissaanerullu pingasoqiusamik agguloqqanera, tassa Inatsisartoqarneq Naalakkersuisoqarnerlu, Erik Jensen oqarpoq.

Taamaammat Kim Kielsen oqaaseqarnermini kinaassusersiortussaanngitsoq Erik Jensen isumaqarpoq:

- Inatsisartut Siulittaasuata pisortatigoortumik avammut nalunaarutaa Naalakkersuisut attaveqaqatigiinnermik akisussaaffiannut tunnganerusoq Siumut isumaqarpoq, Erik Jensen oqarpoq.

- Tassami Naalakkersuisooqatigiinnermi isumaqatigiissutit nassuiarnissaat, isumaqatigiissutit tunngavigalugit naaperiaasimaneruppataluunniit nassuiarnissaat, aningaasaqarnikkut pingaarnersiuinerit tunngavilersornissaat, Naalakkersuisunut tunngasumik politikkip illersornissaa, qinersinermi neriorsuutit pillugit isornartorsiutit akissuteqarfiginissaat Naalakkersuisut akisussaaffigivaat.

Jens Napãtôrlu aamma paasisinnaanngilaa sooq Kim Kielsenip illuatungiliuttut suliassaannik persaqusersuinera:

- Neriorsuutaasut unioqqutinneqarnerat, politikikkut allannguutit imaluunniit qinersinermi neriorsuutigineqartut malinneqannginnerat tikkuaraangatsigu, tamanna demokratiimik ataqqinninnginnerunngilaq – paarlattuanilli tamat oqartussaaqataaneranni pingaarnerpaamik tunngavigineqartunut ilaavoq, Jens NapãtôK oqarpoq.