Avannaa Fisheriesimi siulersuisunut ilaasortaq: Qalorsuarnik aalisarnerup uppernarsaatitaqanngitsumik inerteqqutigineqarnera suliffissaarutsitsisinnaasoq

Sinerissap qanittuani sømilit pingasut iluanni qalorsuarnik saarullinniarnerup pilersaarutigineqartumik inerteqqutigineqarniarnera atorfinnik, aningaasaliissutinik nunatsinnilu aalisakkerivinnut kingunerlutsitsingaatsiarsinnaavoq.  

Jens Kleist Avannaa Fisheriesiminngaanneersoq taama isumaqarpoq, soorlu allaatigisami nutaami politikkikkut ingerlatsineq isornartorsiorneqangaatsiartoq inerteqquteqartoqalinnginneranilu ilisimatusarnikkut uppernarsaateqartoqannginnera isornartorsiorneqartoq.

- Nunarput aalisarnermik suliffissaqartitsisumik, tunisassiorfinnik patajaannerulersitsisumik kalaallillu naleqarnerulersitsinerannik tunngaveqartumik inerteqquteqalersinnaavoq. Tamatuminnga aalajangerneq uppernarsaateqartariaqarpoq - ilimasuutaannaat toqqammaviginagit, Jens Kleist allappoq.

Inerteqqut nalunaarutip nutaap juulip 13-ata tungaanut tusarniaassutigineqarnerani ilanngullugu saqqummiunneqarpoq. 

Uppernarsaatit amigartut

Jens Kleistip oqarnera naapertorlugu, sinerissap qanittuani qalorsuit atorlugit saarullinik maannakkut aalisarneq, saarullinnik peqassutsimut naviarnartorsiortitsinersoq ilisimatuussutsikkut uppernarsaateqanngilaq. Taamaattumik isumaqarpoq, qalorsuit atorlugit aalisarnermut tunngatillugu takorluukkat aallaavigalugit aalajangiisoqassanngitsoq. 

Taassuma qalorsuit atorlugit ullutsinni aalisarneq siornatigut aalisartariaatsimit allaanerujussuunerarpaa. 

- Aalisariutit nutaaliat immap naqqanit assinik atuisarput, atortut eqqoqqissaartumik maluginiutillit atorneqartarlutik, taamaasilluni piffinni aaliangersimaqqissaartuni aalisartoqarsinnaalluni, taanna allappoq erseqqissaatigalugulu, aalisartut taamaasillutik sumiiffiit mianernartut immallu naqqi naleqqutinngitsut aalisarfiginaveersaarsinnaallugit.

Aammattaaq nunatsinni kangerluit ikittuinnaat, sumiifferujussuit sivingavallaanerat qaarsorasappallaarnerallu pissutigalugu qalorsuarnik aalisarfiusinnaanerat maluginiaqquaa.

Aalisarnerullu imminut killilisorneqarnera

Avannaa Fisheriesillu allannera naapertorlugu, misileraanikkut inuussutissarsiutigalugulu aalisarnermi misilittakkat aalisarnerup imminut akilersinnaaneranik takutitsivoq.

Tassa imaappoq, saarulliit sumiiffimmi aalajangersimasumi ulluni arlalinni aalisarneq annertusiartortillugu, immap naqqaniit qimaguttarlutillu kilisaatinit tikinneqarsinnaajunnaartumukariarlutik kingusinnerusukkut utertarput, Jens Kleist allappoq.

Aningaasaqarnikkut assigiissitaq

Siulersuisunut ilaasortap aalisartut allat sumiiffinni taakkunani maannamut pisaqarluartarnerat aamma maluginiaqquaa. 

- Misissuinerit taakkua kalaallit kilisaataasa mikinerit marluk kangerlummi saarulleerutsitsisinnaanissaannik takorluuinermut naapertuutinngilaq, taanna allappoq. 

Allaatigisamili uumassusilerinermut taamaallaat tunngassuteqanngilaq. 

Jens Kleistip allaatiginninnera naapertorlugu, inerteqquteqarneq aalisarnermi nalitusaanermut aningaaasatigut tamakkiisumik kinguneqassaaq.

Taassuma tunisassiorfiit tunisassianik ukiup ingerlanerani pilersorneqarnissartik pisariaqartitsinerat qalorsuarnillu aalisarnerup ukiukkut pilersuisinnaanera bundgarnersortulli ukiukkut pilersuisinnaanerata killeqarnera erseqqissarpaa. 

- Illuinnaasiortumik inerteqquteqarneq aalisartuinnarnik eqquissanngilaq. Nalitusaaneq tamarmi eqqorneqassaaq, Jens Kleist allappoq. 

Taamaattoqassappallu aningaasaleerusuttut ikinnerulernissaat, najukkamilu nalitusaanerit annikillinissaat mianersoqqussutigaa.

Jens Klestilli allaatiginninnera naapertorlugu oqartussat, sumiiffinnik aalajangersimasunik qajannartoqarpat, aalajangersimasumik killilersuisalertariaqarput.

- Biologit sumiiffiit aalajangersimasut mianerisassaaneri pillugit nalunaarsuippata soorunami illersorneqartariaqarput, taama allappoq, aqunneqarnerilu nalinginnaasumik inerteqquteqarnermiit ilisimatuussutikkut tunngaveqartariaqarneri erseqqissarlugu. 

Pissaanilinnut oqariartuut

Taassuma ilisimatuussutsikkut uppernarsaateqartoqarpat saqqummiuteqqullugu politikkerinut kajumissaaraluni allaatigisaq naggaserpaa.

- Sinerissami qanittumi qalorsuarnik maannakkut saarullinniarnerup uumasoqatigiinnik aarlerinartorsiortitsineranik ilisimatusarnikkut uppernarsaatissaqartoqarpa? Uppernarsaatissaqartoqarpat tamanut saqqummiunneqartariaqarpoq. Uppernarsaatissaqanngippat politikkerit inerteqquteqarsinnaanerminnik eqqarsaatiginneqqittariaqarput, Jens Kleist allappoq. 

Avannaa Fisheriesimit oqaatigineqartoq naapertorlugu qalorsuarnik aalisarnerup eqqartorneqarnera piviusumik, ilisimatusarnikkut ullutsinnilu aalisarneq pillugu pisuusinnaasut pinnagit misilittakkat tunngavigineqartariaqarput.