Narsarsuup siunissaa pillugu suleqatigiissitaq aallaqqaataaniik sulisariaqalersoq

Narsarsuup siunissaa pillugu suleqatigiissitaq ukioq manna aallaqqaataaniik sulissaaq. Kommune Kujallermi Kommunep pisortaa Randi Vestergaard Evaldsenip oqarnera naapertorlugu suleqatigiissitaq ukiuni kingullerni uninngasimavoq.

Allattoq Jonna Enoksen Dahl

juulip 03-at 2026 15:44

Suleqatigiissitaq Kommune Kujallerup Namminersorlutik Oqartussallu 2018-mi pilersipaat, ukioq mannalu Qaqortumi mittarfiup ammarneqannginnerani naammassisussaagaluarpoq.

Massakkullu aallaqqataaniik sulisariaqalerpoq.

Narsarsuarmi mittarfiup qulimiguulinnuinnaq mittarfinngornissaa nunaqarfimmut qanoq kinguneqarnissaa suleqatigiissitap pilersinneqarnermini misissugassaasa ilagaat.

Kommune Kujallermi kommunip pisortaa Randi Vestergaard Evaldsen atorfimmini siorna decembarimi atuutilerpoq, suleqatigiissitamilu ilaasortatut sulilerluni. Suleqatigiissitamullu suliassat amerlasimapput:

-Suleqatigiissitaq imatut taalluaannarlugu aallaqqaataaneersimavarput aallaqqaataaniik uani qaammatit pingasut kingulliit ingerlanneqalerluni.

Narsarsuup siunissaa pillugu suleqatigiissitaq

Narsarsuup siunissaa pillugu suleqatigiissitaq Kommune Kujallerup Naalakkersuisullu 2018-mi pilersippaat.

Ineqarnermut attaveqaasersuutinullu Naalakkersuisoqarfik aamma Kommune Kujallerup borgmesteria 2021-mi isumaqatigiipput suliarineqareersut tunngavigalugit misissuisoqassasoq.

Aningaasanut inatsisissaq 2022-mi Inatsisartuniit akuersissutigineqarmat Qaqortumi mittarfittaassamut aningaasaliisoqarpoq.

Tamatuma malitsigisaanik Narsarsuup siunissaa pillugu pilersaarusiornermi tigussaasumik alloriartoqartariaqartoq Naalakkersuisut Kommune Kujallerlu isumaqatigiipput.

Suleqatigiissitap suliani 2023-mi ukiup naanerani naammassissagai pilersaarutaagaluarpoq, naalakkersuisulli suleqatigiissitap sulinerata Qaqortumi mittarfiup ammarneqarnissaata tungaanut sivitsorneqarnissaa februaarimi 2024-imi aaliangerpaat.

Namminersorlutik Oqartussat naapittarsimagaat

Randi Vestergaard Evaldsenip Namminersorlutik Oqartussat suleqatigiissitami suliassat pillugit qaammatini kingullerni naapittarsimavai.

-Ilaatigut uani suliarineqarput, kommunep iluani susassaqarfiit suullu susassaqarfiit kommunemut tunniunneqassanersut namminersorlutik oqartussaninngaanniit taamatuttaarlu namminersorlutik oqartussat suut pisussaaffiit paariinnassaneraat Narsarsuarmut tunngatillugu.

Suleqatigiissitaq ukiuni kingullerni uninngasimasoq Randi Vestergaard Evaldsen nassuiaavoq, sunali peqqutaanersoq oqaatigisinnaanngilaa.

-Kommune Kujallermi Namminersorlutillu Oqartussat akornganni immaqa siornatigut tamakkiisumik pitsaanerpaamik ingerlanikuunngilaq, taamaattumilli aamma oqaatigisinnaavara uani piffimmi kingullermi suleqatigiinneq pitsaasoq aammalu anguniagaqatigiinneq pitsaasoq ingerlalluartoq pilersisimagatsigu, tamannalu aamma suleqatigiinnermik siuariartornermik aamma malitseqarsimavoq.

Suleqatigiissitap suliani qaqugu naammassissaneraa kommunip pisortaata ullulersinnaanngilaa.

-Narsarsuarmi innuttaasut narsarsuarlu pillugu ajunnginnerpaamik anguniagaqarluta aamma kommunitsinniit kommune kujallerminngaanniit suliaqarpugut, taamatuttaarlu politikkikkut pingaaruteqarluinnartut nalunnginnatsigu inissisimammat narsarsuup siunissaa sukumiisumik massakkut suliarineqarpoq. Kisianni ajuusaarnarpoq taama sivisutigisumik utaqqisinneqarsimanerat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.