Trumpip immikkut aallartitaata USA-p nunatsinnik qanorililluni tiguaasinnaanera eqqartoraa

Donald Trumpip nunatsinnut immikkut aallartitaa Jeff Landry USA-p nunatsinnik qanoq tiguaasinnaanera podcastimi eqqartorpaa.

Jeff Landryp præsident Donald Trumpi nunarput pillugu arfininngormat eqqartueqatigisimanerarpaa.

Tassanilu præsidentip nunarput suli piumallugu oqarsimavoq.

Tamanna Jeff Landry aamma taamatut isumaqarpoq.

-Isumaqarpunga pisinnaagipput. Upperilluinnarpara. Periarfissaqarluarpugut præsidentimullu assigiinngitsunik saqqummiussaqarpunga, Jeff Landry taama oqarpoq. 

Nunarput tiguarneqarnavianngitsoq

Podcasti 'The Alex Marlow Show'-imik ateqarpoq aaqqissuussisorlu ateralugu. 

Alex Marlow nutaarsiassaqartitsivimmi talerperliunerusumi Breitbartimi aaqqissuisuusimavoq. 

Jeff Landrymik apersuinermini nunatsinnik tiguaanissamik pilersaaruteqartoqarnersoq aperaa. 

Jeff Landryp pilersaaruteqartoqannginnerarpaa. Kingornalu USA-p nunatsinnik qanoq tiguaasinnaaneranik siunnersuuteqarluni. 

-Kalaallit Nunaanni sakkutooqarfitsinnut sakkutuulersuinitsigut pisinnaallugu isumaqarpunga; USA-p Kalaallit Nunaata akornanni toqqaannaq umiarsuaqarnikkut; Kalaallit Nunaannut toqqaannaq timmisartornikkut Kalaallit Nunaatalu niueqatiginerulerneratigut. 

Sumiiffinnik misissuinerit aallartittut

Amerikamiut Namminersorlutik Oqartussat Illersornissaqarfillu peqatigalugit nunatsinni sakkutooqarfiusimasumiissinnaanerminnik, soorlu Narsarsuarmiissinnaanerlutik misissuisimanerat KNR-ip maajimi saqqummersippaa.

Sakkutuut qullersaat U.S. Northern Commandimi Generali, Gregory M. Guillot Amerikamiut oqartussaaffiini illersornissamut akisussaasuuvoq. 

Taassuma Amerikamiut sakkutuuinit nunatsinni sumiiffiit pingasut soqutigineqarneri martsimi oqaatigaa. Taamatuttaaq Amerikami atorfilittat kujataani sakkutooqarfiliorusullutik oqaatigisimavaat. 

KNR-ip naalakkersuisuni siulittaasoq Jens-Frederik Nielsen (D) Amerikamiut sakkutooqarfiliorusunnerat maajimi saqqummiunneqartoq pillugu aperaa. Tassanilu sumiiffinnik misissuinerit sakkutooqarfiliortoqarnissaanik isumaqanngitsut oqaatigaa.  

-  Maannakkut sakkutooqarfiliortoqarnissaanik assigusunilluunniit pisoqarnissaanik isumaqanngillat.  

Sumiiffinnik misissuinernut suna siunertarineqarnersoq oqaaseqarfigisinnaaviuk? 

- Naalakkersuisuniit nalunaaruteqartoqangajalerpoq. Sakkutooqarnerulernissaa suleqatigiit akornanni eqqartorneqarpoq taamaattuminguna suleqatigiissitaqartugut, taanna oqarpoq.  

Nunarput, USA Danmarkillu akornanni suleqatigiissitaq, USA-mut tunngatillugu aaqqiissutissarsiortoq, ukiaanerani naammassissangatinneqarpoq. 

Jeff Landryp nunatta USA-p ukiup tulliani juulimi ilaaniilereersimanissaanik eqqarsaatini saqqummiuppaa.