Amerikamiut Narsarsuarmiissinnaanertik misissuiffigivaat
Amerikamiut sakkutuuini imarsiortut officeriata Narsarsuaq tikeraarsimagaa, DR-ip apriilimi saqqummiuppaa.
'Misissuiartortinneqartup mittarfiup qanoq innera, umiarsualiviup imartaata qanoq innera itissusaalu aamma akunnittarfiup ammaqqinnissaanut periarfissat paaserusuppai', DR allappoq.
Amerikamiut Washington D.C-mi nunatta, Danmarkip USA-llu suleqatigiissitaat atorlugu sakkutooqarfiit pingasut isumaqatiginninniutigigaat KNR-imit maajip naanerani saqqummiupparput.
Kangerlussuaq Narsarsuarlu pineqartut taamani oqaatigineqarpoq, sumiiffiulli pingajuat tamanut suli ilisimatitsissutigineqarani.
Tamanna Amerikap nunataanik illersuinermi akisussaasumi, U.S. Northern Commandimi qullersap, General Gregory M. Guillotip oqaatigaa.
Sakkutuut imarsiortuinit officeri Narsarsuarmut tikeraareernerata kingorna qaffasissumik atorfilimmik nunaqarfimmut tikeraartoqarnera uissuummissutigineqarpoq.
Tamanna tusarfiit pingasut, nunaqarfimmi najugaqartut imminnut attuumassuteqarfiginngitsut oqaluttuarigaat KNR-ip maanna oqaluttuaraa.
Amerikamiut aallartitat
Sapaatip akunnerata siuliani tikeraartoqarsimasoq, tusarfiit tamarmik KNR-imut uppernarsarpaat.
Amerikamiut tallimat, ataaseq U.S. Marinesimit (Amerikamiut sakkutuuisa imarsiortui aaqq.) sakkutuut naalagaasa ilaat tikeraarput.
Issittumi Sakkutooqarfimmit, Sakkutuut naalagaaneqarfiannit kiisalu Ineqarnermut, Attaveqaasersuutinut Isorliunerusunullu Naalakkersuisoqarfimmit aamma tikeraaqataasoqarpoq.
Tikeraarnerat siornatigut soqutiginninnermut ilassutaanera eqqaassanngikkaanni sumut tunngassuteqarnersoq tusarfiit toqaannartumik oqaatigisinnaanngilaat.
Amerikamiut aallartitaqarfiannit oqaaseqartartup sulisuminnik sapaatip akunnerata siuliani Narsarsuarmiitsitsisimallutik, KNR-imut uppernarsarpaa.
Amerikamiut atorfillit USA-mut isumaqatiginninniarnermut qanittut tamarmik Amerikamiut Kalaallit Nunaata kujasissortaani sakkutooqarfinnik nutaanik pingasunik ammaanissartik kissaatigigaat tusagassiorfimmut BBC-mut uppernarsarpaat.
KNR-ip U.S. Northern Command aamma Sakkutuut naalagaaneqarfiat attaveqarfigai, taakkuli ilanngutassiap saqqumminnginnerani akissuteqanngillat.
Sumiiffinnik misissuisut
Nunanut allanut Naalakkersuisoqarfiup 'site surveys'-imik (sumiiffinnik misissuineq, aaqq.) taaguuteqartumik misissuisoqartoq KNR-imut allakkatigut akissutigaat.
'Kunngeqarfiup Kalaallit Nunaanni eqqaanilu iligisat qanimut suleqatigalugit isumannaassusermik sungiusaqatigiinnermillu suliaqarnerannut nukittorsaaniarnerannut atatillugu sumiiffinnik misissuisoqarpoq', Nunanut allanut Naalakkersuisoqarfik KNR-imut allappoq.
Sumiiffinnillu misissuineq: U.S. Northern Commandip, Sakkutuut naalagaaneqarfiata kalaallillu oqartussaasuisa, tassunga Attaveqaasersuutinut, Ineqarnermut, Isorliunerusunut, Upalungaarsimanermut Nunanullu allanut Naalakkersuisoqarfik ilanngullugu ataqatigiissaareqatigiiffigaat, naalakkersuisoqarfiup ilanngullugu allappaa.
