Politikerit isumasioqatigiinnerup kingorna: Nutaarsiassartaqanngilaq
Isumasioqatigiinnermi matoqqasumi Anders Samuelsenip (LA) danskit naalakkersuisui Naalakkersuisullu USA-p Pituffimmi raadariminik nutartereqqammernera pillugu qanoq paasissutissinneqarsimatiginerat aammattaaq Danmarkip, Kalaallit Nunaata USA-llu akornanni USA-p Pituffimmiinnerani politikkikkut suleqatigiinniarnerat qanoq innersoq akissuteqarfiginiartussaavaa.
Kalaallit Nunaannut ataatsimiititaliami siulittaasoq, attaviitsoq, Aleqa Hammond ataatsimeereernermi akuersaarnerpaavoq.
- Isumasioqatigiilluartoqartoq oqaatigisinnaavara. Tamanna ataatsimiititaliap qanoq alloriaqqinnissaanut pissutissiisoraara.
AAMMA ATUARUK Pituffik-radar opgraderet for knap halv milliard kroner
Pissutsinulli Pituffimmi kiffartuussinissamut USA-mut isumaqatigiissuteqarniarnermut tunngasunik paasissutisanik, nammineq nuannaarutigisaminik, Samuelsen apuussaqanngitsoq nassuerutigaa.
- Ingerlanermi matumani ingerlanneqartussaasinnaasunilu neriulluarsinnaanissara takujuminaatsippara. Takussavarpulli. Oqaasissat kingulliit uagut tungitsinniit ministerillu tungaaniit suli oqaatigineqanngillat, Aleqa Hammond oqarpoq.
Aaja: Isumaqatigiinniarnerit paamaarunneqarput
Inuit Ataqatigiinniilli Aaja Chemnitz Larsen nunanut allanut tunngasunut ministerip ministereqarfimmilu atorfillit arlallit akunnerup ataatsip affaatalu ataatsimeeqatigineqarneranni paasissutissiiffigineqarpallaarsorinngilaq.
- Ilisimasaqarnerulingaartutut misigisimanngilanga (...) Suli kinguarsasoqarluni pissusissamisoorluinnartut danskit kalaallillu suliffeqarfiannit suliarineqartussamik kiffartuussinissamut isumaqatigiissuteqannginera iluarisimaanngilara.
AAMMA ATUARUK Nutarterisarsimanerit USA-p ukiumut nalunaarusiaani atuarneqarsinnaapput
Aaja Chemnitz Larsen naapertorlugu danskit naalakkersuisui Naalakkersuisut peqatigalugit kiffartuussinissamut isumaqatigiissummik nutaamik inissiinissaq pillugu USA-mut kimigiisertariaqarput.
Aaja Chemnitz Larsenip naalagaaffeqatigiit USA-llu akornanni oqaloqatigiinnerit ullumikkornit ammanerusariaqarsorai.
Assersuutigalugu USA-p Pituffimmi radariminik nutarteringaatsiarnera pillugu danskit naalakkersuisui Naalakkersuisullu USA-p sakkutooqarfimmi suliatik pillugit ukiumoortumik nalunaarusiaani titarnermi ataasiinnarmi paasissutissiissutigineqarpoq.
Partiit Enhedslisten Dansk Folkepartiillu nunanut allanut tunngasunut ministerip akissutaa aamma pakatsissutigaat.
Nunanut allanut tunngasunut ministerip isumasioqatigiinneq nammineq oqaaseqarfigerusunngilaa.
AAMMA ATUARUK Nunatta Danmarkillu USA-p ataatsimeeqatiginissaa ukiuni arlalinni taamaatiinnartarsimavaat