Nutaarmiormiut: Pisimasoq tamarmik attorneqaatigivaat
Tarnip pissusaanik ilisimasalik Hanne Kith André aamma Nutaarmiuni upalungaarsimanermut ataqatigiissaarisuuvoq. Imaaliallaannarli oqaatigisinnaanngilaa Nutaarmiormiut qanoq innersut. Taamaattorli nassuiarpaa inuiaqatigiit ikitsunnguit, taama tupannartigisumik sakkortutigisumillu misigisaqartut qanoq qisuariarsinnaanerinik.
- Inuiaqatigiit taama ikitsigisut tamakkerlutik sunnerteqqassapput, tassanilu unammillernartorissavaa ilaquttat nunaqarfiup avataaniinnerat. Taamaammat avataaninngaanniit ikiorneqarnissaat pisariaqartorujussuuvoq, Hanne Kith André oqarpoq.
Taamaammat Hanne Kith Andrép nunatsinnit Nutaarmiuni pisumut misiginneqataasutikiuunnerilu nuannaarutigeqaa.
- Ilaqutaasut amerlasuut sukkasuumik Nutaarmiunukarput, aammalu politikerit misiginneqataanertik malunnartimmassuk assut iluarpoq. Inuiaqatigiinnut taama ikitsigisunut iluaqutaalluinnarluni, tarnip pissusaanik ilisimasalik Hanne Kith André oqarpoq.
Aammalu nunaqarfimmiut toqutaasunut toqutsisumulluunniit tamakkerlutik ilaquttatut attuumassuuteqanngikkaluarlutik, eqqugaanngitsoorsimajunnanngitsut oqaatigaa. Naak alianartumik taama pisoqaraluartoq, inuiaqatigiit taama ikitsiginerat Hanne Kith Andrép iluaqutissartaqarnerarpaa.
- Paasisakka naapertorlugit ataatsimoorlutik imminnut ikorfartoqatigiilluarsimaqaat, naak eqqugaaqqagaluaqalutik, Hanne Kith André oqarpoq.
Pinartoqartillugu upalungaarsimatitsineq immikkuullarippoq, taannalu tassaanngaannartumik ilungersunartunik pisoqaraangat atulertarpoq. Aamma aliasuttunut ikorfartuiartortut Nutaarmiunut pingasunngormat tikimmatali, taakkua ikiuuttupilussuupput.
- Tikiunnerminniik ingerlaannaq sulilerput, nalilersinnaaleramikkulu kikkut ikioqqaartariaqarnersut oqaloqatiginnilerput, Hanne Kith André naggasiivoq.
Tarnip pissusaanik ilisimasallit pisortaata Hanne Kith Andrép naatsorsuutigaa, upalungaarsimaneq sapaatit akunneri siulliit sisamat ingerlanneqarallassasoq. Ikiuinerullu pinartortaa qaangiunnerarpaa, nunaqarfimmilu eqqissiimiallattoqarnerarlugu.
