Tusagassiorfik: Nunatta silaannartaanik sumi alapernaarsuiffittaarnissamik aalajangernissaq kinguartittoq
![](/sites/default/files/styles/image_934x467/public/2023-11/7V9A0891-Enhanced-NR.jpg?itok=iyy8zle-)
Kunngeqarfik Danmark nunatta silaannartaanik 2031-mi alapernaarsuisuulissaaq.
Naalakkersuisulli Danmarkimilu naalakkersuisut nunatta silaannartaanik alapernaarsuiffittaassap sumiinnissaa isumaqatigiinngitssutigigaat,tusagassiorfik Sermitsiaq allappoq.
Naalagaaffiup suliffeqarfiutaa, Naviair, nunatsinni alapernaarsuiffittaassami akisussaasuussaaq. Alapernaarsuiffittaassarlu Nuummiippat pitsaanerpaassasoq, Naviair isumaqarpoq.
Attaveqaatersuutinut naalakkersuisup Hans Peter Poulsenip (S) Danmarkillu angallernermut ministeria Thomas Danielsen (V) allagaat Sermitsiap pissarsiarisimasaani tamanna erserpoq.
Mittarfeqarfiit Greenland Airports ilaatigullu Air Greenland suleqatiginerulerumallugit Nuummi mittarfissuup qanittuani alapernaarsuiffittaarnissi Naviairip kissaatigaa.
Alerpernaarsuiffittaassaaq Nuummiippat pitsaanerussasoq, Danmarkimi naalakkersuisut aamma isumaqarput.
Allamiinnissaali soorlu Qaqortumiinnissaa periarfissaanersoq, naalakkersuisut misissuisitseqqaarusupput.
Oqartussammi suliffeqarfiutaat naalakkersuisup Hans Peter Poulsenip oqarnera naapertorlugu Nuup avataanut siammartertariaqarput.
Naalakkersuisut Naalagaaffik alapernaarsuiffittaassaq Kangerlussuarmiissinnaaneranik Narsarsuarmiissinnaaneranilluunniit misissueqqusareerpaat.
Naalakkersuisut Danmarkimilu naalakkersuisut sumi alapernaarsuiffittaarnissaq isumaqatigiissutiginngimmassuk taassumi sumiinnissaanik aalajangernissaq kinguartippoq.
Canada Islandilu nunatta silaannaanik maanna alapernaarsuisuupput.