Nunatta isiginnaartitsivia angerlarsimaffeeruppoq

Suli nalunarallarpoq radiohusitoqaq atorneqaleqqissinnaassanersoq oquk pissutigalugu. Illutoqqami tassaniipput Nunatta isiginnaartitsivia, eqqumiitsuliortut kattuffiat EPI, nipilersortartut kattuffiat INNK, Pilersuiffik kiisalu KNRip toqqorsivia nuutaasivialu.

Nunatta isiginnaartitsiviani siulersuisut siulittaasuata pakatsisimaqisup akueriinnartariaqalinnguatsiarpaa allatut ajornartumik isiginnaartitsinermi inerisaanerminni illumik allamik atugassarsiortariaqassallutik.

- Assut nunatta isiginnaartitsivianut pissutsit maanna atuutilersut erloqinarput massakkorluinnaq illumik allamik pisariaqartitsigatta, Nunatta isiginnaartitsiviani siulersuisut siulittaasuat Juaaka Lyberth nalunaarpoq.

- Taamaattumik periarfissat tamaasa atorlugit aaqqiissutaagallarsinnaasumik ujarlertariaqarpugut. Neriuppunga kultureqarnermut Naalakkersuisoq ikiuussinnaajumaartoq. Naammanngilarmi isiginnaartitsinermut inatsiseqarnerput aamma pisariaqarluinnarpoq toqqissimanartunik avatangiiseqarnissaq inatsit malinneqassappat, Juaaka Lyberth taama oqarpoq.

Radiohusitoqaq 1957imi piareerpoq KNRilli immikkoortui allat maanna heliportitoqqami hangarimi allaffeqarfeqarput.