Nunatta Billundillu akornanni timmisartuussisarneq iluatsilluartoq
Kangerlussuup Billundillu akornanni timmisartuussisalerluni, Air Greenland upernaaq nalunaarpoq.
Angallavittaap taassuma marsip 29-ani ammarneraniit qaammatit pingasut qaangiuttut iluatsitsilluarfiulereerpoq.
Air Greenlandip tuniniaanermut pisortaa, Henrik Søe, taama oqarpoq:
- Taassuunaarlutik angalasut maannamut amerlassusaat naammagisimaarpagut, angalasut aamma unnersiorfigisaqaatigut.
Jyllandimiit angalasut orullutaat nutaamik angallaveqalernermik kinguneqartoq
Air Greenland Kangerlussuup Billundillu akornanni timmisartuussisalinngikkallarmat, Jyllandimiit nunatsinnukartut Københavnimiit nunatsinnukartuninngarnit ullormik ataatsimik sivisunerusumik angalasariaqartarnertik qatsullugu ukiorpaalunni orullutigisarpaat.
Aammali kalaallit Jyllandimi ilaquttaminnut tikeraarusuttortaqartaqisut, angalasunik isumasiunermi erserluinnarpoq. Taamaammat Air Greenland angallavittaarpoq:
- Taakkualu kissaataat Billundimut timmisartuussisalernikkut piviusunngortissinnaasimavarput. Taamaammat angalasut unnersiornerat nuannaarutigaarput, aamma angalatitsiviit unnersioqalutillu tapersersuilluarput, taanna oqarpoq.
Angallavittaaq taanna suliluunniit ammaqqajanngitsoq angummanniarsarilereersimagaluarlutik iluatsitsilluarfiulereertoq, Air Greenlandip angalatitsiviata, Greenland Travelip, oqaatigaa:
- Soqutiginnittut amerlaqimmata billetsit nungukatareerput, Greenland Travelip pisortaanera Peter Bastrup oqarpoq.
Allanik immaqa angallaveqalerumaartoq
Taamaammat Kangerlussuup Billundillu akornanni timmisartuussisarnini attatiinnassagini, Air Greenland nalunaarpoq.
Jyllandimullu allanik immaqa aamma angallaveqalerumaartoq, Henrik Søe oqarpoq:
- Imminut akilersinnaagaangat angallavimmik nutaamik pilersitsisarpugut. Soqutiginnittulli amerliartuinnarpata Aalborgimut timmisartuussisalerataannaavugut, aamma Kalaallit Nunaata Billundillu akornanni timmisartuussisarnerput sivitsussanerlutigu isumaliutigilereerparput, taanna oqarpoq.