Air Greenland: Takornariat amerlassusaasa killilernissaat pisariaqalersinnaavoq
Coronap nunarsuaq tamakkerlugu tuniluunnera peqqutaalluni nunatsinni ukiuni kingullerni marlunni takornariaqarpianngiiveriarluni aasaq manna takornariaqaqaaq.
Amerlangaarmata taakku politikkikkut aalajangikkamik ukiumut amerlanerpaaffilertalernissaat isumaliutigisariaqalersinnaagipput, Air Greenlandimi siulersuisut siulittaasuat Bodil Marie Damgaard KNR-imut oqarpoq.
Nunarsuarmi sumiiffinni takornariaqarfiulluartuni arlallit takornariartussanik atattuinnartumik piffissaniluunniit aalajangersimasuni atuuttussanik amerlanerpaaffiliisoqartarpoq.
Soorlu Ecuadorimi qeqertarpaat Galapagosikkut Spaniamilu Barcelona taamaaliortartunut ilaapput.
Assersuutigalugu Barcelonami sumiiffinni aalajangersimasuni akunnittarfiliornissamik killilersuinikkut inuillu attartortitsinermut oqartussanit akuersissuteqarnissaannut inatsisiliornikkut taamaaliortarput.
- Nunatsinnut takornariat ukiut tamaasa qassiusarnissaannik aalajangiinissarput pisariaqartoq tamatumalu angulertornissaa pingaaruteqartoq isumaqarpugut. Nunatsinnut takornariartussat qassiusarnissaannik inatsisiliornissarput pisariaqalerataannaavoq.
Air Greenlandimili siulersuisut siulittaasuat takornariat qassiusarnissaannik nammineq siunnersuuteqanngilaq.
Piareersalertortariaqartut
Nuummi Ilulissanilu mittarfissuassat atoriaannanngorpata nunatsinni pissutsit massakkutut itsillugit takornariaqarnerusalernissatsinnut piareersimanngitsugut, ineqarnermut attaveqaatersuutinullu naalakkersuisup Erik Jensenip (S) sapaatip akunneranni uani oqaatigaa.
- Nassuerutigissavara nunarput piareeqqasutut isikkoqanngilaq, naalakkersuisoq Erik Jensen KNR-mut oqarpoq.
AAMMA ATUARUK Borgmesteri: Ilulissani takornariat tikittarnerat pitsaanerusumik aaqqissuunneqartalertariaqarput
Aamma Ilulissani Qeqertarsuup tunuatalu eqqaani aasaq manna takornariat imaaginnavimmata taakkunani takornarialerisut artukkerneqarsimaqisut, Avannaata Kommuniata borgmesteria Palle Jerimiassen (attaviitsoq) aamma oqarpoq.
Ingammik unnuiffissaalatsisoqarpoq. Aammali neriniartarfiit, angallassisartut kiffartuussinermillu suliallit takornariarpassuaqarnerani aamma amigaataapput.
Bodil Marie Damgaardip Air Greenlandimeersup oqarnera naapertorlugu nunatsinni inuussutissarsiortut naalakkersuisullu mittarffissuaqaleriarpat takornariaqarnerusalernissamut piareersalertortariaqarput.
- Piareersimanissatsinnut tamatta suleqatigiillutalu kivitseqatigiittariaqarpugut iluatsissavarpullu, taanna oqarpoq.
Suli kingusinaanngitsugut
Tamannalu siusinnerusukkut pereersimasussaagaluarpoq.
- Mittarfissualiortoqarnissaa qangali aalajangerneqarpoq. Mittarfissuassallu atulernissaannut maanna ukiut marluinnanngorput. Piareersimanissatsinnullu massakkut qanoq iliuuseqartariaqarpugut, Bodil Marie Damgaard oqarpoq.
AAMMA ATUARUK Naalakkersuisoq: Landet er ikke klar til de store lufthavne
Inuussutissarsiortut namminersortut ingammik akunnittarfiliortitsilereertariaqartut, Erik Jensen isumaqarpoq. Sanaartornermilli suliallit sulisussaalatsillutillu sanaartornermi atortussaalatsigamik taamaaliornissaq angumeriuminaassinnaavoq. Taamaammat politikereqatinilu qanoq iliornissamik isumaliulertortariaqarlutik, Erik Jensenip nassuerutigaa. Qanorpiarli iliortoqassanersoq oqaatiginngilaa.
- Namminersortut pilersitsinngippata taava uagut politikkikkut qanoq iliiortariaqarnitsinnik nalilersueqqittariaqarpugut, Erik Jensen oqarpoq.
Qanorli iliornissamik kingusinaartoqanngitsoq, Air Greenlandimi siulersuisut siulittaasuat isumaqarpoq.
- Suli kingusinaanngilagut. Pilersaarusiorluartariaqarparpulli, Bodil Marie Damgaard oqarpoq.