Naalakkersuisoq: Nunarput mittarfissuartaarnissamut piareeqqanngilaq

Naalakkersuisut nunatsinni sanaartukkani aningaasartorfiunerpaat, milliardilikkaanik nalillit, tassa mittarfissuassat piareernissaannut nunarput suli piareeqqannginnerarpaat.

- Nassuerutigissuara nunarput piareeqqasutut isikkoqanngilaq, ineqarnermut attaveqaasersuutinullu naalakkersuisoq, Siumumeersoq, Erik Jensen, KNR-mut oqarpoq.

Nuummi Ilulissanilu mittarfissuassat pilersaarutit malillugit 2024-p naajartulernerani atulissapput. Taakkua miffigineqarsinnaalerlutillu qangattarfigineqarsinnaalerpata inuit amerlanerujussuit angallatilernissaat naatsorsuutaavoq.

Ernumasoq

Naalakkersuisulli maannamut piareersaatit naammagisimaanngilai. Ernumavormi.

- Neriniartarfinnik akunnittarfinnillu sanaartorneq annertuumik pilersaarusiorfigalugu massakkut aallarnisapallanneqartariaqarpoq. Taamaalilluta tattoqisaanneq annertooq soorlu massakkut maani Ilulissani aasaanerani piusimasoq ajornartorsiut qaangissagutsigu, Erik Jensen oqarpoq.

Ilulissat takornariaqarfissuuvoq. Unnuiffiusinnaasut aasap aallartilaarneraniit ukiarneranut ullumi tamarmik ulikkaaqqasareerput.

Naalakkersuisup akunnittarfiit neriniartarfiillu amerlanerulerpata nunarput piareeqqasutut aatsaat nalilersinnaalissallugu aamma oqaatigaa.

- Taamaattumik nunatsinni namminersortut ingerlatseqatigiiffiilu assigiinngitsut ineriartortitsinissaat nukingernarpoq, Erik Jensen oqarpoq.

Nalilersueqqissasut

Ukiulli marluinnaat iluani sanaartukkat angisuut, soorlu neriniartarfiit akunnittarfiillu naammassineqarsinnaanerat piviusorsiunngilaq. Nunatsinnimi sanaartorfinni suliaqartut ullumi sulisussameereeqaat.

Namminersortut Naalakkersuisut amigaataannik, tassa neriniartarfinnik akunnittarfinnillu pilersitsinngippata qinikkat nalilersueqqinniarput.

- Namminersortut pilersitsinngippata taava uagut politikkikkut nalilersueqqittariaqarpugut taavami qanoq iliortariaqartugununa, Erik Jensen oqarpoq.