Air Greenland Billundimut upernaaru timmisartuussisalissasoq

Air Greenland Kangerlussuarmiit Jyllandimi Billundimut toqqaannartumik upernaaru timmisartuussisalissaaq. Timmisartuutileqatigiiffik taama nalunaaruteqarpoq.

Angalatitseqatigiiffiit oqaloqatigineqareernerisigut, Air Greenlandillu ilaasui suminngaanniit sumullu angalasarnerannik misissuisoqareersorlu, taama aalajangertoqarpoq.

Jyllandimilu Billundimiit Kangerlussuarmut toqqaannartumik angalasinnaanerup pisariinnerunera misissuinerup takutippaa. Kalaallimmi amerlasuut Danmarkip kippasissortaani aamma najugaqarput, Air Greenlandip tuniniaanermut pisortaa Henrik Søe oqarpoq.

AAMMA ATUARUK Air Greenland: Takornariat amerlassusaasa killilernissaat pisariaqalersinnaavoq

- Aqqutip nutaap pilersinneqarneratigut angalaneq ataatsimut isigalugu sivikinnerulissaaq, Kalaallit Nunaannit Kalaallit Nunaannullu ilaasutta akornanni amerlasuut unnueqqaartariaqassanngillat.

- Billundip timmisartoqarfia aqqutigalugu angalasartut 15 procentiisa missaat Kalaallit Nunaannut atassuteqartartut Billundimi timmisartoqarfiup misissuinerata takutippaa - ilaquttat imaluunniit ikinngutit aqqutigalugit atassuteqartarlutik.

Billundip Kalaallit Nunaatalu akornanni timmisartuussisalernissap imminut akilersinnaalernissaa, Billundip timmisartoqarfiata pisortaanerata Jan Hessellundip taamaammat qularutiginngilaa:

AAMMA ATUARUK Kangerlussuarmi inissaqartitsinnginneq – Air Greenlandip ilaasui Københavnimut utertinneqartut

- Kalaalerpassuit Billundip ungasinngisaani najugaqarput, amerlasuullu Kalaallit Nunaannut allatigut taassuma saniatigut atassuteqarput - pinngortitamilluunniit misigisaqarusuttut. Aqqut nutaaq taamaammat soqutiginarpoq, Air Greenlandilu peqatigalugu tamanna ilisaritissinnaagatsigu tulluusimaarutigaarput, taanna oqarpoq.

Billundip Kangerlussuullu akornanni timmisartoq siulleq aappaagu poorskimi, marsip ulluisa 29-anni, angalasussatut pilersaarutigineqarpoq. Aqqutip nutaap aappaagu oktobarip ulluisa aqqarnata tungaanut ammanissaa pilersaarutaavoq.

Timmisartuutileqatigiiffik Jettime aqqummik ingerlatsisuussaaq, timmisartoq Boeing 737-800 189-inik ilaasoqarsinnaasoq atorneqassalluni.

Angalanissamut billetsit Air Greenlandip nittartagaa aqqutigalugu ullut 14-it ingerlaneranni pisiarineqarsinnaalissapput.