Politikki Inuussutissarsiutit Ilinniarneq

Nunatta akunnattoorfii ilinniartunit oqaluuserineqarput

Ilinniartitaanerni ingerlaqqiffiusuni ilinniagaqartut Nunarput ukiut qulit qaangiuppata qanoq isikkoqarnissaanik innersuussuteqarput

Allattoq Helle Nørrelund Sørensen

septembarip 19-at 2015 19:13

Tamanna Inuit Ataqatigiit, ilinniagaqartut peqatigiiffii Avalak aamma Ili Ili suleqatigalugit Folketingimi isumasioqatigiinnermi Grønland 2025-mik taaguuserneqartumi pivoq.

Ilinniartitaanerni ingerlaqqiffiusuni ilinniagaqartut inuiaqatigiinni kalaallini maanna akunnattoorfiusut arlallit Nunatsinnit inuussutissarsiutinik ingerlatalinnit tapersersorneqarlutik isummerfigaat.

Aamma atuaruk Isumasioqatigiinneq: Nunarput 2025-mi qanoq isikkoqassava?

Aningaasaliinerni, aalisarnermi, takornariaqartitsinermi nutaaliornermi ineriartortitsinermilu akunnattoorfiit aaqqiivigissallugit ilinniagaqartut suliassinneqarput.

Suleqatigiinnikkullu isumassarsianillu avitseqatigiinnikkut ajornartorsiutinut aaqqiissutaasinnaasunik siunnersuuteqartinneqarput.

Tamanna unammisitsinertut ingerlanneqarpoq, siunnersuutillu politikerinit Nunatsinnilu inuussutissarsiutinik ingerlatalinnit naliliiffigineqarput, isumasioqatigiissitsinerlu ajugaasumik toqqaanermik naggaserneqarluni.

Aamma atuaruk Ilinniagallit Nunatta siunissaa unammissutigileraat

Unammisitsinermilu ineriartortitsinerup takornariaqarnerullu iluanni suliassinneqartut ajugaapput, ilaatigut internitikkut inuit attaveqaqatigiittarfii atorlugit takornarianik sullissisut aaqqissuussaanerusumik ikioqatigiinnerulernerisuigut Kangerlussuarmit Sisimiunut ingerlaviup, Artic Circle Trailimik taaguusillip takornarissanit amerlanernit ingerlaffigineqartalernissaanik siunertalimmik siunnersuuteqaramik.

Suliassaritinneqartullu isumassarseriallaqqissuunissai, 2025-llu tungaanut piviusunngortinneqarsinnaanissai ajornaatsumillu piviusunngortinneqarsinnaanissai unammisitsinermi piumasarineqarpoq.

Isumasioqatigiinnermi katillugit 70-it peqataapput, 45-rut missaanni ilinniagaqartut peqatigiiffiininngaanneerlutik.

Suliaqartitsinermi tapersersuisuupput, Karsten Høy (Greenland Holding), Mikael Thinghuus (Royal Greenland), Anders Stenbakken (Visit Greenland), Georg Julin (Greenland Perspective, Københavns Universitet) aamma Poul Hededal (Rambøll).

Nunatsinni inuussutissarsiutinik ingerlatallit naliliisut tassaapput, Aningaasaqarnermut Siunnersuisooqatigiit siulittaasuat, Torben M. Andersen, GE-mi pisortaq Brian Buus Pedersen, GE-p siulersuisuinut ilaasortaq Christian Keldsen, CSR Greenlandimeersoq Anne Mette Christiansen aamma Inuit Ataqatigiit sinnerlugit Folketingimut ilaasortaq Aaja Chemnitz Larsen.