NALILIINEQ Nunatsinni illoqarfiit anginerit avataanni umiarsuarnik ajutoornissaq qaninneruvoq
Namminersorlutik Oqartussat Illersornissamullu ministereqarfiup nalilersuinerat taama inerneqarpoq.
Uuliamilli assartuutit uuliamik aniatitseriataarsinnaanerat mikisuararsuartut nalilerneqarpoq.
Takornariartaassuilli ajunaarsinnaanerat uuliamillu assartuutit ikkarlillutik Kalaallit Nunaata sineriaani uuliamik annertuumik mingutitsisinnaanerat ukiorpassuarni annilaangatigineqarsimapput.
Aamma atuaruk Umiarsuit takornariartaatit aatsaat taama amerlatigisut
Ajutoortoqarsinnaaneranulli upalungaarsimanissaq pisariaqarpoq - ingammik kitaata Kujataani illoqarfiit annerit avataanni, orlogskaptajn Jens Peter Holst-Andersen oqarpoq.
- Ajunaartoqarsinnaanera uuliamillu aniatitsisoqarsinnaanera umiarsuarnik Nunatsinni angallaffiunerpaani aarlerinarnerpaavoq. Tamanna illoqarfiit annerit, soorlu Nuup avataani aarlerinarnerpaavoq.
Misissueqqissaarneq naapertorlugu sinerissap avataani ajunaartoqarsinnaanera ukiut pingasukkaarlugit annertunerpaasarpoq. Tamatumunnga ikkarlinneq peqqutaalluni.
- Kialuunniit Kalaallit Nunaata sineriaani angalasimasup ilisimavaa ikkarlittoqariataarsinnaasartoq. Avataatigoorlunili ikkarlittoqarsinnaarpianngilaq, allatigulli ajutoortoqarsinnaalluni.
Aamma atuaruk Konservativet Issittumut tunngatillugu missingersuutit marloriaatinngortikkusukkaat
Kitaata Kujataani imaatigut angallaffiunerpaat tassaapput immap assiliornerit aquttullu eqqarsaatigalugit pitsaanerpaajusut, naliliisoqarpoq.
Ajunaarnerup kingunerisaanik sinerissap avataani uuliamik aniatitsisinnaaneq naatsorsorneqarsimavoq agguaqatigiisillugu ukiut 33-kaarlugit pisinnaasutut. Tamatumunnga pissutaavoq sinerissatsinni uuliamik assartuutit qaqutigooqimmata.
- Umiarsuit ajunaarnerisa kinguneranik uuliakoortoqarsinnaanera qujanartumik annikittuararsuusoq misissueqqissaarnerup takutippaa. Pisoqarsinnaavoq allarpassuarnulli naleqqiullugu taamaattoqarsinnaanera annikeqaaq.
Aamma atuaruk Umiarsuaq takornariartaat Sullualukkuulersoq
Illersornissaqarfiup Issittumi siunissami suliassarisinnaasaanik nalunaarusiaq iliuusissanik tikkuussinngikkaluarluni misissueqqissaarnerusoq, Holst-Andersen oqarpoq.
- Ingasattajaassanngilanga oqaruma upalungaarsimaneq ullutsinni misissungassaasoq. Tamannalu danskit kalaallillu oqartussaasuisa ataatsimoorukkunikku iluassasoq, Nunatsinni Savalimmiunilu illersoqatigiiffimmi orlogskaptajn Jens Peter Holst-Andersen oqarpoq.
Misissueqqissaarneq pillugu Issittumi Sakkutooqarfimmeersumik Kalaallit Nunaannilu upalungaasimasuneersunit Namminersornerusuneersunit oqaaseqartitsisinnaasimanngilagut.
Misissueqqissaarnerup inerniliussaa naapertorlugu imaatigut angallanneq ukiut qulit ingerlaneranni taamaallaat sisamanngorlugit avikkaanni ataatsimik qaffakkumaarpoq. Peqqutaanerpaarlu tassaalluni angisuunik suliniuteqartoqannginnera.
