Umiarsuaq takornariartaat Sullualukkuulersoq
![](/sites/default/files/styles/image_934x467/public/article_images/nordic_orion_1.jpg?itok=unDkR6Iw)
Umiarsuaq takornariartaat 2016-imi Alaskami Kodiakimit aallassaaq, Sullualukkooriarlunilu Nunatsinnukarluni tamatumalu kingorna New Yorkimut utissalluni. Atuagassiaq Maritime Danmark taama allaaserisaqarpoq.
- Umiarsuarmik takornariartaammik angalanermi pinngortitarsuup nalissaqanngitsup misigisaqarfiginissaanut kulturikkullu misigisassat annertuut misigisaqarfiginissaannut periarfissaqassaaq, ilaasullu Crystal Cruisep kiffartuussineranik pitsaalluinnartumik arfinilinnik ullorialerneqarsimasumik kiffartuunneqassapput, Edie Rodriguez, Crystal Cruises-imi pisortaaneq Maritime Danmarkimut oqarpoq.
AAMMA ATUARUK Danskit umiarsuaatileqatigiiffiat siullersaalluni Sullualukkoortuuvoq
Umiarsuaatileqatigiiffiup umiarsuaataa takornariartaata Crystal Serenityp ulluni 32-ni angalanermini Kodiakip saniatigut, Dutch Harbor, Nome, Ulukhaktok, Cambridge Bay, Pond Inlet, Ilulissat, Sisimiut, Nuuk, Bar Harbor, Boston, Newport aamma New York tikissavai.
Aggustip 16-ianit septembarip 17-iata tungaanut angalanissaq inummut ataatsimut 19.755 dollarseqassasoq, umiarsuaatileqatigiiffiup Crystal Cruisep nittartagaani atuarneqarsinnaavoq.
Issittumi pissutsit pillugit immikkut ilisimasallit ilaasunik ilitsersuissapput
Umiarsuarmut aamma ilaassapput ilisimasassarsiornermik immikkut ilisimasallit 14-it, taakkulu Qaasuitsup killeqarfiata avannaatungaani issittumi pissutsit immikkut ittut pillugit ilaasunik ilitsersuissapput.
Aammattaaq umiarsuup naalagaa aquttunik immikkut ilinniarsimasunik ikiorteqartinneqassaaq. Umiarsuup naalaagaa angalanerup ingerlanerani periarfissaqartillugu ilisimasassarsiortoqartarnissaanik pilersaarpoq.
AAMMA ATUARUK Ipuinnarluni Sullualukkut angalalersoq