Ipuinnarluni Sullualukkut angalalersoq
![](/sites/default/files/styles/image_934x467/public/article_images/charles-hedrich.jpg?itok=uDOoGpPB)
Sullualukkut umiarsuit angallannerat annertusiartorpoq. Ipuinnarlunili Sullualukkoortoqarsinnaava? Frankrigimiup Charles Hedrichip taamaaliortoqarsinnaanasoraa.
Umiatsiaaqqamik ipuinnarluni qaammatini pingasuni angalanissani Alaskami nunaqarfimmit Walesimit sapaatit akunnerani uani aallartippaa. Wales Amerikap nunavittaani Bering strædep sineriaani nunaqarfiit kujasinnersaraat.
Hedrich tassanngaanniit Chuckip imartaatigut Inupiaat illoqarfiannut Alaskap avannarpasinnerusortaaniittumut Barrowimut ingerlaarniarpoq kingornalu Canadamut ingerlaqqilluni.
Umiatsiaaraa immikkut sanaajuvoq, siniffigisinnaanngorlugulu qulisaalluni.
Umiatsiaarartaaq seqerngup nukinga atorlugu sarfaliuutinik atortorissaarusersugaavoq, qaammataasakkullu oqarasuaata taakkunannga sarfalersugaalluni.
Ernerata ataatami angalanera nunamit malinnaaffigissavaa, ullormut marloriarluni attavigisassallugu, ajornartorsiulissagaluarpallu annaassiniarnissaminut piareeqqassalluni.
Hedrich sapaatit akunnerinut marlunnut nerisassaminik nassarpoq, Sullualukkoornerminilu nunaqarfinnut taquassaminik pisiniartarnissani pilersaarutigaa.
Alaska Dispatch naapertorlugu, Charles Hedrich nikallujuilluni ingerlaarpoq pilersaarutinilu malissangatillugit. Siullerpaamimmi ipuinnarluni angalalinngilaq.
Atlantikummi imartaa, Senegalimit Brasiliamut, ipuinnarluni aamma ikaarsimavaa.
Angalaneq Baffinip qeqertaani nunaqarfimmi qaammatit pingasut qaangiuppata naammassineqarnissaa naatsorsuutigineqarpoq.