Konservativet Issittumut tunngatillugu missingersuutit marloriaatinngortikkusukkaat
Illersornissaqarfiup Issittumi siunissami qanoq suliaqarnissaanut inassuteqaateqarfiusumik nalunaarusiaq kinguaattoorutigineqangaatsiartuq Folketingimit suli utaqqineqaraluartoq, pineqartup politikkikkut oqallisigineqarnera qangali aallartereerpoq.
Folketingip illersornissamut ataatsimiititaliaani siulittaasoq Konservativeneersoq Rasmus Jarlow isumaqarpoq Illersornissaqarfk Issittumi suliaminut aningaasat amerlanerungaatsiartut atortariaqaraluarai.
- Det Konservative Folkeparti naapertorlugu Issittumi suliatsinnut aningaasat amerlanerungaatsiartut atortariaqaraluarpagut. Allaat aningaasaliissutaasut marloriaatinngortinneqartariaqaraluarput, KNR-imut taama oqarpoq.
Aamma atuaruk Illersornissamut isumaqatigiissummut peqataarusuttut
Naalagaaffeqatigiit nunallu allat Issittumi soqutigisaat malinnaaffigissallugit pisariaqarpoq.
- Illersornissaqarfiup Issittumi inissisimanera siunissami annertunerusariaqarpoq. Qalasersuup imartallu annertuut oqartussaaffigilernissaat sulissutigaarput. Taamaammaat sumiiffimmiittariaqarpugut, tamannalu ullumikkumut naleqqiullugu annertunerulersittariaqarparput, Jarlow taama isumaqarpoq.
Issittumi suliassanut pituttugaasut
Issittoq pillugu Aarhusimi sisamanngormat ataatsimeersuartoqarnerani, Rasmus Jarlow taama oqarpoq.
Ilisimatuut, politikerit, atorfilittat allallu ataatsimeersuarnermi isumaqatigiissutigaat Issittumi sillimaniarneq nakkutilliinerlu annertusartariaqartoq. Tamannalu danskit tungaannit nakkutilliinermut atortorissaarutit nutaaliat, soorlu qaammataasat dronellu atorlugit ingerlakkusuppaat, sakkutooqarnikkut annertusaanngikkaluartik.
Aamma atuaruk Ministereqarfiup issittoq pillugu nalunaarut kinguartippaa
Tamakkuli aningaasanik naleqarput. Aningaasallu taakku Illersornissaqarfiup suliaanit allanit, 2015-imi 21 milliardit koruuninut missingersuuteqarfigineqartunit, pissarsiarineqarsinnaanngillat, Jarlow taama isumaqarpoq
- Illersornissakkut sipaarniarfigineqarsinnaasunik takusaqarsinnaanngilara, aamma Issittup illersornissaanut pituttugaavugut, KNR-imullu uppernarsarpaa Parisimi sapaatit-akunnerata siuliani saassussineq pissutigalugu De Konservativet illersornikkut suliassanik pingaarnersiuinerannik allanngortitsinngitsoq.
Nunanut allanut ministeri: Issittumut tunngatillugu sipaarniartoqassanngilaq
Danskit naalakkersuisuisa illersornissaq pillugu isumaqatigiinniarnerni Issittup tulleriiaarinermi pingaarutilimmik inissisimatinneqarnissaa siornatigut oqaatigereerpaat. Illersornissamullu ministerip Issittumi suliassat nukittornissaannut qanoq annertutigisumik qanorlu pisoqassanersoq oqaaseqarfigerusunngikkarpaa, Illersornissaqarfiup siunissami suliassai pillugit misissueqqissaarineq, kinguaattoorutigineqartoq, utaqqeqqaarusukkamiuk.
Aamma atuaruk Ilisimatuut: Tartupaluk Nunavut Kalaallit Nunaatalu ataatsimoorullugu piginiarlissuk
Danskilli nunanut allanut ministeriat Kristian Jensen (V) Danmarkip Issittumi suliaminik annertusaanissaanik neriorsuuteqarpoq, naak danskit nunanut allanut ministereqarfiat ukiut tulliit sisamat ingerlanerini 200 millionit koruunit missaliorlugit sipaarniartussanngoraluartoq.
- Periusissiatta ingerlanneqarnissaanut Issittumi suliavut attatiinnarnissaat pisariaqartipparput. Aamma kunngeqarfik tamakkerlugu assigiiaartumik oqaloqatigiinissaq qulakkeertariaqarparput, KNR-imut taama oqarpoq.
Danskit nunanut allanut ministeriaqarfianni sipaarniarnerit Danmarkip nunarsuarmi sumiiffinni allani suliaasigut ingerlanneqassapput, nunanut allanut ministeri taama oqarpoq.
