Illersornissamut isumaqatigiissummut peqataarusuttut
Folketingimimi ilaasortat Atlantikup Avannaaneersut illersornissamut Danmarkimi isumaqatigiissutissap nutaap isumaqatiginninniutigineqarneranut peqataatinneqarnissaat pilersaarutigineqanngikkallarmat:
- Illersornissamut isumaqatigiissutissap isumaqatiginninniutigineqarneranut peqataanissarput kissaatigigaluarpara. Danmarkimi partiit maanna isumaqatiginninniartuummata allaanngilaq matut matullugit maanna isumaqatiginninniartoqartoq, Inuit Ataqatigiit Folketingimut ilaasortaatitaat Aaja Chemnitz Larsen KNR-imut taama oqarpoq.
Aamma atuaruk Ministereqarfiup issittoq pillugu nalunaarusiaq kinguartippaa
Naak Issittoq illersornissamut tunngatillugu Danmarkimi naalakkersuisut naapertorlugit pingaarutilittut inissisimagaluartoq, Folketingimi ilaasortat ilaannit pingaartinneqanngippallaartoq, taassuma ernummatigaa.
- Suut pingaartikkusunneruneraat soorunami ilisimanngilara. Issittorlu ilumut pingaartinneraat aamma apeqquserusussinnaavara, Aaja Chemnitz Larsen oqarpoq.
Siulittaasoq: Kalaallit Nunaat isumaqatigiinniarnerni peqataassaaq
Kalaallit Nunaata Folketingimut ilaasortaatitaasa isumaqatiginninniarnernut peqataanissaat allaqqunneqarsinnaanngitsoq, Folketingip illersornissamut ataatsimiititaliaata siulittaasua Rasmus Jarlov oqarpoq.
Isumaqatiginninniarnerit ukiortaamit aallartinnissaat ilimagineqarpoq:
- Kalaallit Folketingimi ilaasortaatitaasa isumaqatiginninniarnissanut peqataanissaminnut kajumissuseqarmata paasisinnaavara, aamma taamaatussaavoq. Illersornissaq pillugu tulliani isumaqatigiissuteqartussanut ilaanissaat allaqqunneqarsinnaanngilaq. Tamanna qularutigineqassanngilaq, Folketingip illersornissamut ataatsimiititaliaata siulittaasua Rasmus Jarlov, Konservatiivineersoq KNR-imut taama oqarpoq.
