Ilisimatuut: Tartupaluk Nunavut Kalaallit Nunaatalu ataatsimoorullugu piginiarlissuk
Canadap Danmarkillu Nunarput peqatigalugu Tartupaluup assortuussutigineqarnera unitsillugu qeqertaq ataatsimut pigisariaqarpaat.
Issittumi pissutsinik immikkut ilisimasallit, canadamiu danskerlu, taama siunnersuuteqarput.
Aarhusip Universitetiata aaqqissugaanik Issittoq pillugu ataatsimeersuarnermut ullaap manna ammarneqartumut tikilluaqqussutitut siunnersuut saqqummiunneqarpoq.
AAMMA ATUARUK Canadamiup Tartupaluk tunniukkusuppaa
Ataatsimeersuarnermik aqutsisoq inuiaqatigiinnilu pissutsinut tunngatillugu lektori, Michael Böss, canadamiullu professorip Michael Byersip Tartupaluup nunat ataatsimoorullugu pigisariaqarsoraat.
- Tartupaluup condominiumminngortinneqarnissaa siunnersuutigaarput. Tassa sumiiffik marluullugu piginnaatitaaffinngortillugu. Imaanngitsoq nunap ilaanik tunniussisoqassasoq, nunali pineqartoq avinneqassaaq, Michael Böss KNR-imut taama oqarpoq.
AAMMA ATUARUK Kalaallit danskillu killeqarfiit pillugit piumasaqaatitik Canada pissutigalugu annertusarpaat
Issittup sinneranut pingaarutilimmik takutitsinerussaaq
Qeqertaq Nunatta Canadallu akornanni ikermi Kennedy Kanalimiittoq kimit pigineqarnersoq Danmarkip Canadallu 1930-kkunnili isumaqatigiinngissutigaat.
Qeqertaq najugaqarfigineqanngikkaluartoq pinngortitamilu pisuussutinik peqanngikkaluartoq ukiorpassuarni assortuussutigineqarnerata unitsinnissaa marluullugu pigineqalernissaanik isumaqatigiissuteqarneq pingaarutilimmik takutitsinerussasoq, ilisimatuut marluk taama isumaqarput.
- Maanna periarfissaqarpugut, Canadami naalakkersuisut nutaajupput aamma Danmarkimi naalakkersuisut nutaajupput - taamaammat ajornartorsiutip peqqusiileqinartup iluarsinissaanut periarfissaqarpugut Issittorlu pillugu suleqatigiilluarsinnaanitsinnik takutitsilluta. Taamaammat pissusissamisuussaaq territoriatsinni ajornartorsiutivut aamma aaqqiissuteqarfigigutsigit, Michael Böss taama oqarpoq.
