Nunarsuaq 3,1 gradit angullugit kiannerulissangatinneqartoq
Nunarsuaq ataatsimut isigalugu 3,1 gradinik kianneruleriartorsinnaavoq.
Tamanna Naalagaaffiit Peqatigiit avatangiisit pillugit suleqatigiiffiata Unepip nalunaarusiaani sisamanngornermi saqqummersinneqartumi inerniliussaavoq.
Nunat tamalaat gassinik silaannarmik kissakkiartortitsisartunik ullumikkutut aniatitsiinnassappata, suliffissuaqalinnginneranut naleqqiullugu nunarsuaq ataatsimut isigalugu 2100-utinnagu 2,6 gradit 3,1 gradillu akornanni kiannerulissasoq nalunaarusiami tassa inerniliunneqarpoq.
Silap pissusiata allanngoriartornerata akiorniarneqarneranut atatillugu Parisimi isumaqatigiissummi anguniakkat piviusunngortissinnaanissaat taamaasillutik ajornakusoorsinnaapput, suliffissuaqalinnginneranummi naleqqiullugu 2100-mi annerpaamik 2 gradinik, sapinngisamillu annerpaamik 1,5 gradinik kiatsissimanissaa Parisimi isumaqatigiissutigineqarpoq.
- Nunarsuarmi ataatsimut isigalugu siuariartortoqannginneranik ukioq manna nalunaarusiap takutikkaa ajuusaarnarpoq, Anne Olhoff, nalunaarusiornermut atatillugu ilisimatuussutsikkut aaqqissuisoq oqarpoq.
