Nunarput naartusunut ilummoornermut akiuussusiisalernissamik isumaliuteqartoq

Ilummoornermut akiuussuserneqarnissaq Danmarkimi naartusunut tamanut neqeroorutaavoq. Nunarput assinganik iliortalerniarnersoq ilisimaneqanngilaq.

Allattoq Mads Malik Fuglsang Holm

juulip 10-at 2023 07:47

Nutserisoq Hanne Petersen

Nunaminni naartusunik ilummoornermut, tassa kighostemut, akeqanngitsumik akiuussusiisoqartalissasoq, Danmarkip naalakkersuisui aalajangeqqammerput. Danmarkip nunamut namminermut peqqissutsimullu ministeria Sophie Løhde (V) tusagassiorfinnut taama nalunaarpoq:

- Ilummoorneq inoorlaat naalungiarsuillu qaammatialuinnarnik utoqqaassusillit akiuussuserneqarsimanngitsortaasa toqqutigisinnaavaat.

- Taamaammat naartusut naarmiortik inunngorpat ilummuuleqqunagu akiuussuserneqarnissamik neqeroorfigitittalernerat pingaarpoq, ministeri oqarpoq.

ILUMMOORNEQ SUUA?

Ilummoorneq bakteriamik Bordetella petussisimik anersaartuutitigut tunillatsinneruvoq.

Ilummoornermut sakkortuumik quersornermik kingunerisaanillu siggajoortumik nipeqartumik anersaartortoqartarlunilu ilaatigut meriartoqartarpoq. Ersiutit qaammatinik pingasunik sivisussuseqarsinnaapput.

Meeraaqqat akiuussuneqanngikkaangamik ilummoorneq ilungersunartumik ajornerpaamillu pisoqarnerani inuunermut aarlerinartorsiorfiusinnaavoq.

Ilummoorneq ukioqatigiinnut allanut timimikkut nalinginnaasumik illersuuteqartunut navianartutut isigineqarneq ajorpoq.

Najoqqutaq: Statens Serum Institut

Nunatsinni naartusunut ilummoornermut aamma akeqanngitsumik akiuussusiisoqartasalissanersoq misissorneqartoq, nunatta nakorsaanera Henrik L. Hansen KNR-imut oqarpoq.

Innersuussinnginnermili misissoqqaagassaaloqarpoq.

- Naartusunik 800-t missaannik ukiut tamaasa akiuussusiisussanik sulisoqarnissaq naammattunillu akiuussutissaateqarnissaq pisariaqarpoq. Akiuussutissat nillataartillugit qeritillugilluunniit assartorneqartartussaassammata, nunatsinni inoqarfinni tamani ilummoornermut akiuussusiisalernissaq suliassarujussuuvoq, Henrik L. Hansen oqarpoq.

Ilummoornermut akiuussusersinnissaq nunatta meerartaannut neqeroorutaasareerpoq. Meeqqalli pingasunik aatsaat qaammateqalereeraangamik akiuussuserneqartarmata, ingammik inoorlaat ilummoornermik nappaateqalernissamut qaninnerusarput.

Naartusunut neqeroorutaasareertoq

Ilummoornermut akiuussusiinissaq nunatsinnut naartusunut tamanut neqeroorutaasareerpoq, januaarilli naanerani atorunnaarluni.

Tassa Peqqinnissaqarfik coronavirusip tuniluutileruttornerani ilungersuaqqunagu ilummoornermut akiuussusiinissaq 2020-mi neqeroorutaalerpoq.

Nunattali nakorsaanerata oqarnera naapertorlugu (Peqqinnissaqarfimmi, aaqq.)) "pissutsit immikkut illuinnarunnaarmata" neqeroorutaajunnaarpoq.

Aamma atuarukAkiuussusersuisoqannginnera naartusut toqqissisimanngissutigaat

Naartusulli ilarpaalui taassuma neqeroorutaajunnaarneranik isorinningaatsiarput.

Naarmiortimmi inunngorpat ilummuuleqqunagu akiuussuserneqarnissamik neqeroorfigineqarsimanatik, taakku KNR-imut oqarput.

Naartusut ilummoornermut akiuussuserneqarsimasut nalunaarsorneqarsimanngimmata qasserpiaanersut nalugini, nunatta nakorsaanera taamanikkut nassuerpoq.

Tassa ilummoornermut akiuussusiinissaq naartusunut neqeroorutaajunnaarmalli qaammatit arfinilingajaat qaangiussimalerput, neqeroorutaaleqqissanersorli maanna misissorneqarpoq.

- Naartusunut ilummoornermut akiuussusiisarnissap neqeroorutaaleqqinnissaata pitsaaqutaanik ajoqutaanillu Nunatta Nakorsaaneqarfia Peqqinnissaqarfillu nalilersuissapput. Taakku peqqissutsimut naalakkersuisumut qaammatini tulliuttuni innersuussuteqassapput, Henrik L. Hansen oqarpoq.

Danmarkimi tuniluuttartoq

Ilummoorneq Danmarkimi ukiut pingasuniit tallimanik akuttussuseqartumik tuniluuttartoq, Danmarkip peqqissutsimut aqutsisoqarfia ilisimatitsivoq.

Tassani nakorsaaneq, Kirstine Moll Harboe, tusagassiorfinnut ima nalunaarpoq:

- Massakkorpiaq ilummoortut amerlagisassaanngikkaluarlutik amerliartorput.

- Taamaammat naartusut sapinngisamik amerlanerpaat ilummoornerup tuniluutileqqinnginnerani akiuussusereersimanissaat qularnaarumallugu neqeroorutaalernera isumatusaarnerusoq isumaqarpugut, Kirstine Moll Harboe oqarpoq.

Danmarkimi naalungiarsuit ilummoornermut attuumassutilimmik toqqutilittut 1995-imili nalunaarsukkat arfiniliupput.

Nunarput isorartoqimmat ilummoorneq tamaani tuniluutinngingajattarpoq. Nunatsinni ilummoortoq kingulleq 2020-mi nalunaarsorneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.